…E programa lo ta interaktivo i ‘bibu’ tur djasabra na Radio Active!…
WILLEMSTAD – 10 di òktober 2018 – Resientemente Ofisina di Turismo di Kòrsou (CTB) a duna inisio na un proyekto nobo di konsientisashon yamá ‘CTB den bo bario’. E proyekto ‘CTB den bo bario’ ta forma parti di CTB su programa di konsientisashon ‘Kòrsou ta dushi’. E proyekto ta inkluí un programa radial transmití ‘bibu’ for di e studio mobil di Radio Active kaminda lo informá nos komunidat di áreanan turístiko i lo kombiná esaki ku diferente kueskaminda públiko i oyente tin chèns di gana diferente premio.
Tur siman lo stashoná e studio mobil na un otro área turístiko. E programa lo keda transmití ‘bibu’ for di e área turístiko kreando un interakshon informativo. Pa e promé edishon a stashoná e studio mobil na Caracasbaai kaminda Dr. Steven Martina, Minister di Desaroyo Ekonómiko, CEO nobo di CTB, sr. Paul Pennicook, ehekutivonan di CTB, representantenan di Radio Active i demas invitadonan tabata presente. Sr. Tyron Brunken un guia turístiko lokal a elaborá riba historia di e área, tambe a hasi algun pregunta na oyentenan tokante turismo, kaminda por a gana diferente premio. Un danki ta bai na Radio Active 104.5 FM pa nan kolaborashon i partnership den e proyekto nobo aki.
CTB ta kontentu ku e resepshon di e promé edishon kaminda tambe algun oyente a yega na Caracasbaai pa presensiá e apertura di e proyekto. Un invitashon ta bai pa “like” e Facebook page di ‘Kòrsou ta dushi’ pa sa mas di e kampaña di konsientisashon i tambe pa haña sá na unda e studio mobil lo bai ta próksimamente.
