…Turismo a produsí 935 mion florin den e promé 10 lunanan di aña…
WILLEMSTAD – 21 di novèmber 2018 – Ofisina di Turismo di Kòrsou (CTB) ta raportá 11% di kresementu den kantidat di turista di estadia na òktober 2018. Den sifranan apsoluto ta trata aki di 3.569 turista mas na òktober 2018 hibando e total na 35.551 turista di estadia kompará ku 31.982 e mesun luna aña pasá.
Kòrsou a risibí 14.854 turista di estadia for di Hulanda. Hulanda e merkado for di kual nos ta risibí mas tantu turista, a klousura òktober ku un kresementu di dòbel sifra di 12%. Hulanda ta kontinuá komo e merkado prinsipal; 42% di e total di turista risibí ta prosedente for di e pais aki. Òktober tabata un di e lunanan mas faborabel pa hulandesnan bishitá Kòrsou. E dianan mas popular ta durante e vakashon relashoná ku periodo di hèrfst. E delaster buelo temporal entre Kòrsou i Bruselas a keda ehekutá dia 21 di òktober. Kòrsou a registrá kresementu di 23% turista for di Bèlgika. Un total di 821 turista prosedente di Bèlgika a bishitá Kòrsou na òktober 2018.
For di Estádos Unídos un kresementu di 11% a keda registrá na òktober 2018. Òktober ta konosí tambe komo e luna den kual lokalnan ta biaha pa pasa vakashon na Merka. Saliendo for di e punto di bista aki i tòg registrá kresementu di dòbel sifra for di Estádos Unídos ta algu sigur positivo pa menshoná. E esfuersonan di merkadeo di Kòrsou dor di CTB i su partnernan a sòru pa mas demanda for di Estádos Unídos pa nos pais. Un total di 4.825 turista di estadia for di Estádos Unídos a keda registrá na òktober. Aña pasá e kantidat di turista di estadia prosedente di Estádos Unídos tabata 4.331. Kòrsou a risibí un total di 5.792 turista di estadia na òktober for di Nort Amérika kual ta un kresementu di 11%. Aña pasá e kantidat risibí for di Nort Amérika tabata 5.226.
Tur dos merkado di enfoke den Sur Amérika a presta bon na luna di òktober registrando sifranan dòbel di kresementu. For di Colombia un oumento di 99% a keda registrá pa un total di 2.353 turista di estadia. E kresementu den turista di estadia ta komo resultado di e akshonnan di merkadeo kombiná ku diferente grupo ku nos a risibí di forma konsistente for di e merkado aki. Brazil a registrá kresementu di 22% na òktober 2018. Total nos a risibí 1.118 brasilero. E kresementu eksepshonal for di Brazil ta komo resultado di e kantidat di stul adishonal ku Copa Airlines for di Panama. Total region di Sur Amérika a krese ku 26% no opstante un bahada di 12% for di Venezuela na luna di òktober.
Turismo di estadia yanüari te ku òktober 2018
Total Kòrsou a risibí 345.282 turista di estadia durante e promé 10 lunanan di 2018. Esaki ta un kresementu di 6% kompará ku aña pasá. Durante e promé 10 lunanan di aña 2018 un total di 143.741 turista hulandes a keda risibí. Aña pasá e mesun periodo un total di 129.899 turista hulandes a bishitá nos pais pa un kresementu di 11%. For di Estádos Unídos un kresementu di 17% a keda registrá pa un total di 58.503 turista di estadia di yanüari pa òktober 2018. Na 2017, un total di 49.442 turista di estadia a keda risibí for di Estádos Unídos. Canada a krese ku 5% mas turista pa un total di 16.456 turista di estadia durante e promé 10 lunanan di 2018.
Turismo a produsí un impakto direkto di 935 mion florin pa nos ekonomia lokal durante e promé 10 lunanan di aña 2018. Turistanan prosedente di Europa ta responsabel pa 440 mion florin kual ta 47% di e impakto direkto total ku a keda generá. E impakto direkto for di demas regionnan ta di e siguiente manera: Nort Amérika ku 215 mion, Sur Amérika ku 158 mion i Karibe i otro regionnan 122 mion florin.
