…Un luna ku resultadonan impreshonante pa Kòrsou…
WILLEMSTAD – 29 di yanüari 2019 – Ofisina di Turismo di Kòrsou (CTB) ta raportá sifranan preliminar pa desèmber 2018. Na desèmber 2018 e kantidat di turista di estadia a konosé un kresementu di 17%. Den sifranan apsoluto ta trata di 6.912 turista mas na desèmber 2018 hibando e total na 47.058 turista di estadia kompará ku 40.146 e mesun luna na aña 2017.
Desèmber 2018 ta un luna kaminda nos a konosé diferente rèkòrt pa ku kantidat di turista di estadia:
- Kasi 18.000 turista di estadia for di Hulanda
- Mas ku 10.000 turista di estadia for di Nort Amérika
- Kasi 4.000 turista di estadia for di Colombia.
Kòrsou a risibí un kantidat rèkòrt di turista di estadia for di nos merkado prinsipal kual ta Hulanda. For di Hulanda nos a risibí 17.994 turista di estadia na desèmber 2018 kual ta un kresementu di 14% kompará ku desèmber 2017. Introdukshon di e buelonan di Condor for di Frankfurt, Alemania ku a kuminsá 7 di novèmber último a resultá den kresementu positivo for di Alemania. Un total di 1.661 turista Aleman a keda risibí na desèmber 2018 kual ta un kresementu di 63% kompará ku desèmber 2017.
E esfuersonan kontinuo di merkadeo di Kòrsou dor di CTB i su partnernan ta kosechando su frutanan pa nos isla. Pa luna di desèmber 2018 tabatin un kresementu di 26% den kantidat di turista di estadia for di Estádos Unídos kompará ku desèmber 2017. Ademas for di Canada tambe a registrá un kresementu di 39%. Komo resultado di e prestashon positivo aki for di Estádos Unídos i Canada, Kòrsou a risibí un total di 11.140 turista di estadia for di Nort Amérika na desèmber 2018 kual ta un kresementu di 29% kompará ku desèmber 2017.
Sur Amérika a presta bon registrando sifranan dòbel di kresementu. E region a krese ku 18%. Den sifranan apsoluto un total di 9.876 turista di estadia a keda risibí na desèmber 2018 for di Sur Amérika. Colombia tabata e merkado ku mihó prestashon for di Sur Amérika. For di Colombia un oumento di 38% a keda registrá pa un total di 3.938 turista di estadia.
For di Karibe un kresementu di 5% a keda registrá. Kòrsou a risibí un total di 2.617 turista di estadia for di nos pais bisiña na desèmber 2018.
