…11% kresementu den turismo di estadia…
WILLEMSTAD – 28 di febrüari 2019 – Kòrsou su produkto turístiko ta keda atraé míles di bishitante pa nos isla, esei por keda konkluí for di e sifranan kontinuo di kresementu di turismo di estadia. Ofisina di Turismo di Kòrsou (CTB) ta raportá sifranan preliminar pa yanüari 2019. Na yanüari 2019 e kantidat di turista di estadia a konosé un kresementu di dòbel sifra di 11% den kantidat di turista di estadia. Den sifranan apsoluto ta trata di 4.416 turista mas durante e promé luna di 2019 hibando e total na 44.151 turista di estadia kompará ku 39.735 na yanüari 2018. Yanüari 2019 tambe ta un luna kaminda nos a konosé diferente rèkòrt pa ku kantidat di turista di estadia:
·Mas di 18.000 turista di estadia for di Hulanda
·3.768 turista di estadia prosedente di Canada
Kòrsou a surpasá e kantidat rèkòrt di turista di estadia for di Hulanda ku a keda risibí na desèmber 2018. Aña a kuminsá ku un prestashon positivo kaminda 18.298 turista di estadia a bishitá nos isla for di e pais ku mas ta produsí pa Kòrsou. Esaki ta un kresementu di 7% kompará ku yanüari 2018. Introdukshon di e buelonan di Condor for di Frankfurt, Alemania ku a kuminsá 7 di novèmber 2018 a resultá den kresementu positivo for di Alemania. Un total di 1.753 turista Aleman a keda risibí na yanüari 2019 kual ta un kresementu di 33% kompará ku yanüari 2018.
E esfuersonan kontinuo di merkadeo di Kòrsou dor di CTB i su partnernan ta kosechando su frutanan pa nos isla. E kantidat di turista risibí for di Nort Amérika ta representá 24% di e total di turista ku a bishitá nos isla. Total 10.534 turista di estadia a keda risibí for di Estádos Unídos i Canada. Tur dos pais a registrá kresementu di dòbel sifra di 14% na yanüari 2019. Estádos Unídos a registrá 6.766 turista di estadia miéntras for di Canada un kantidat rèkòrt di 3.768 turista di estadia a keda risibí. Canada ta benefisiá di e kresementu den airlift for di e buelonan adishonal ku Air Canada e temporada di wenter aki.
Sur Amérika a presta bon registrando sifranan dòbel di kresementu. E region a krese ku 24%. Den sifranan apsoluto un total di 7.519 turista di estadia a keda risibí na yanüari 2019 for di Sur Amérika. Colombia i Brazil a registrá kresementu di respektivamente 22% i 12% den kantidat di turista di estadia.
Impakto ekonómiko i kantidat di anochi pa turista
CTB i MEO ta usa e modelo ‘Turistika’ pa kalkulá e impakto ekonómiko ku ta keda generá for di industria di turismo. Un impakto direkto di 127 mion florin a keda generá pa ekonomia lokal na yanüari 2019. E impakto direkto generá for di turismo na yanüari 2019 ta 6% mas kompará ku yanüari 2018. 45.6% di e impakto direkto total ta generá for di bishitantenan for di Europa kualnan ta responsabel pa 58 mion florin. Nort Amérika, Sur Amérika i otro regionnan a generá respektivamente 34, 21 i 14 mion florin. E kantidat total di anochi pa turista a krese ku 5% na yanüari 2019. Total 411.846 anochi a keda registrá na yanüari. Turistanan for di Europa a keda 261.388 anochi na Kòrsou kual ta un kresementu di 4%. Turistanan prosedente di Nort Amérika i Sur Amérika a keda un kantidat di respektivamente 80.806 i 53.802 anochi na yanüari 2019.
