…18% kresementu den turismo di estadia na febrüari…
WILLEMSTAD – 25 di mart 2019 – Kòrsou su turismo ta sigui krese. Ofisina di Turismo di Kòrsou (CTB) ta raportá un kresementu di dòbel sifra di 18% den kantidat di turista di estadia na febrüari 2019. Den sifranan apsoluto ta trata di 6.372 turista mas durante e di dos luna di 2019 hibando e total na 41.145 turista di estadia kompará ku 34.773 na febrüari 2018.
Hulanda a surpasá den prestashon registrando 16% mas turista di estadia na febrüari. Total 17.277 turista di estadia a keda risibí for di e pais ku mas ta produsí pa Kòrsou. Alemania tambe a sigui krese registrando 1.708 turista Aleman na febrüari 2019 un kresementu di 24% kompará ku febrüari 2018. E kresementu eksepshonal for di Alemania ta direktamente relatá na airlift adishonal ku e buelo di Condor for di Frankfurt, Alemania.
E esfuersonan kontinuo di merkadeo di Kòrsou na Nort Amérika dor di CTB i su partnernan ta kosechando su frutanan pa nos isla. E kantidat di turista risibí for di Nort Amérika ta representá 27% di e total di turista ku a bishitá nos isla na febrüari. Total 10.896 turista di estadia a keda risibí for di Estádos Unídos i Canada. Estádos Unídos a krese ku 15% miéntras Canada a registrá 19% mas turista di estadia. Tantu Estádos Unídos komo Canada ta benefisiá di e kresementu den airlift for di e buelonan adishonal ku American Airlines i Air Canada e temporada di wenter aki.
Sur Amérika a presta bon registrando sifranan dòbel di kresementu den kantidat di turista di estadia. E region a krese ku 32%. Den sifranan apsoluto un total di 5.434 turista di estadia a keda risibí na febrüari 2019 for di Sur Amérika. Colombia a registrá 1.609 turista di estadia kual ta un kresementu di 33%.
For di nos paisnan bisiña den Karibe un kresementu di 23% a keda registrá. Aruba a krese ku 4%. Ta konosí ku arubianonan ta gusta biaha pa Kòrsou pa partisipá na e evento kultural musikal, Festival di Tumba. E aña aki no tabata un eksepshon. CTB a mira un kresementu den yegada di turista prosedente di Aruba rondó di e fechanan di Festival di Tumba.
Impakto ekonómiko i kantidat di anochi pa turista
CTB i MEO ta usa e modelo ‘Turistika’ pa kalkulá e impakto ekonómiko ku ta keda generá for di industria di turismo. Un impakto direkto di 242 mion florin a keda generá pa ekonomia lokal den e promé dos lunanan di 2019. E impakto direkto generá for di turismo ta 10% mas kompará ku e mesun periodo na aña pasá. 46% di e impakto direkto total ta generá for di bishitantenan prosedente di Europa kualnan ta responsabel pa 110 mion florin. Nort Amérika, Sur Amérika i otro regionnan a generá respektivamente 67, 37 i 27 mion florin. E kantidat total di anochi pa turista a krese ku 10% den e promé dos lunanan di 2019. Total 782 mil anochi a keda registrá. Turistanan for di Europa a keda 497 mil anochi na Kòrsou kual ta un kresementu di 9%. Turistanan prosedente di Nort Amérika i Sur Amérika a keda un kantidat di respektivamente 161 mil i 93 mil anochi durante e promé dos lunanan di 2019.
