…Alrededor di 3500 persona a bishitá e marshe di informashon…
WILLEMSTAD- 29 di aprel 2019 – Resientemente a tuma lugá e di seis edishon di ‘Curaçao InfoMart’ na Sürnam. Maske tin hopi informashon di Kòrsou na Sürnam komo resultado di e promoshon kontinuo ku Ofisina di Turismo di Kòrsou (CTB)ta hasi na e pais tòg ta importante pa un biaha pa aña trese tur stakeholders huntu pa den un lapso di dos dia duna informashon aktualisá di Kòrsou su produkto turístiko na públiko. Esnan ku a bishitá e marshe di informashon e aña aki a haña informashon di paketenan di alohamentu, konekshon aéreo i eventonan ku lo bai tin próksimamente na Kòrsou.
‘Curaçao InfoMart’ ta konta ku partisipashon di e industria turístiko kompletu tresiendo huntu stakeholdersnan di Sürnam i esnan for di Kòrsou pa asina e biahero por haña informashon ku ta relevante tantu den e fase promé ku su biahe komo durante. Meskos ku añanan anterior CTB a wòrdu kompañá e biaha aki tambe pa Fundashon Bon Intenshon ku a presentá e artistanan ku ya ta konfirmá pa e próksimo edishon di ‘Curaçao North Sea Jazz Festival’. ‘Curaçao InfoMart’ e aña aki a tuma lugá na MidTown Mall den distrito di Wanica- riba e promé dia, i e di dos dia riba lugá di stashonamentu di TBL Cinemas na Paramaribo. Alrededor di 3500 persona a bishitá ‘Curaçao InfoMart 2019’ ku un biaha mas tabata kompletamente den ambiente di Kòrsou.
CTB ta gradisí tur partner for di Kòrsou pa nan partisipashon. Ta trata di; Celebrations, Kura Hulanda Lodge, Kura Hulanda Village & Spa, Livingstone Jan Thiel Resort, Santa Barbara Beach & Golf Resort Curaçao, Scuba Lodge & Ocean Suites i Sunscape Curaçao Resort, Spa & Casino. Tambe un danki na tur partner for di Sürnam; Assuria Verzekeringen, CHM Travel, Fly AllWays, Multi Travel, Packed and Ready tours, Paramaribo Travel Centre, Rasonic Travel, Satyam Holidays, SoE Car Rental, Unique Package Plan, VEMS Travel Consultancy i Waldo’s Travel Center.
