WILLEMSTAD- 31 di mei 2019 – Kòrsou su ruta eksitante pa sigui logra kresementu den turismo di estadia, nos senario di airlift pa aña 2020 i despues i e produkto turístiko úniko ku Kòrsou tin di ofresé a forma parti di e tópikonan durante un simposio organisá spesialmente pa mayoristanan prosedente di diferente parti di mundu. ‘Curaçao Global Trade Symposium 2019’ ta konta ku partisipashon di 75 mayorista i aerolínea. E simposio a inisiá dia 29 di mei i lo kontinuá te ku 2 di yüni próksimo. E mayoristanan a keda invitá pa bin sinti pa nan mes tur loke Kòrsou tin di ofresé na bishitantenan for di eksterior i tambe kondusí reunionnan ku partnernan di sektor privá. E simposio a inisiá ku un seremonia di Bon Biní kual a tuma lugá bou di e streanan na Curaçao Aloe Plantation.
Ofisina di Turismo di Kòrsou (CTB), Curaçao Hospitality and Tourism Association (CHATA) i otro partnernan den sektor privá a uni pa realisashon di e simposio importante aki ku ta duna un kontribushon signifikante na kresementu i e strategia di desaroyo di nos industria turístiko.
E apertura ofisial a tuma lugá dia 31 di mei i a inkluí presentashon di CEO di CTB sr. Paul Pennicook, President & CEO di CHATA sr. Miles Mercera i CEO di Curaçao Airport Partners sr. Ralph Blanchard. Parti mèrdia a sigui seshonnan di presentashon i deliberashon ku e mayoristanan riba e plan di merkadeo di kada region. Despues e mayoristanan a haña un rekorido na entre otro, Curaçao Marriott Beach Resort i Corendon Beach Resort kual ta e dos proyektonan turístiko grandi den desaroyo na e momentunan aki. Djasabra e mayoristanan lo partisipá na un seshon di ‘Marketplace’ kaminda nan lo topa di forma individual ku partnernan den industria privá pa negoshá kontraktnan nobo. Lo klousurá e simposio ku un sena festivo pa yama danki na e mayoristanan pa nan partisipashon i kompromiso pa ku e produkto turístiko ku Kòrsou ta ofresé.
‘Curaçao Global Trade Symposium 2019’ ta konta ku partisipashon di representantenan for di e 4 merkadonan grandi esta Europa, Nort Amérika, Sur Amérika i Karibe.
