WILLEMSTAD – 12 di yüni 2019 – Komo parti di e esfuersonan pa riba base kontinuo mehorá e produkto i servisio ku ta keda ofresé na nos turistanan, Ofisina di Turismo di Kòrsou (CTB) ta organisá di 12 pa 14 di yüni un kurso di 3 dia bou di guia di e eksperto riba aria di seguridat internashonalmente renombrá, Dr. Peter Tarlow. E kurso ta spesialmente dirigí riba personanan ku riba base diario ta direktamente òf indirektamente enbolbí ku seguridat di e turista i di nos komunidat. Pa e partisipantenan e kurso aki ta ofresé un tremendo oportunidat pa nan sigui desaroyá nan abilidatnan i siña kon pa atendé aspektonan di seguridat. Dr. Tarlow tin hopi eksperensia ku e aspekto di seguridat dirigí riba e aria di turismo. E tabata enkargá ku entrenamentu di e personal di seguridat pa e weganan olímpiko na Vancouver i Brazil.
Añanan anterior tambe CTB a kordiná diferente kurso dirigí riba e aspekto di seguridat kual a keda bon risibí serka tur e partisipantenan. E partisipantenan e aña aki ta inkluí representantenan di: Avila Beach Hotel, Renaissance Curaçao Resort & Casino, Sunscape Curaçao Resort Spa & Casino, Papagayo Curaçao, Santa Barbara Beach & Golf Resort Curaçao, Curaçao Ports Authority, Stichting Slachtofferhulp Curaçao, Fundashon Kuido di Ambulans Kòrsou, Kuerpo Polisial Kòrsou, Budget Rent a Car Curaçao, Luxury Car Rental, Sinusta Taxi Curaçao, Thirty Steps, Konsulado di Hulanda, di Estádos Unídos i di Sürnam, CHATA i CTB.
