Selebrashon buelo inougural di Caribbean Airlines for di Trinidad & Tobago pa Kòrsou

WILLEMSTAD- 2 di ougùstùs 2019 – Den un ambiente ameno na Aeropuerto Internashonal Hato a tuma lugá selebrashon di e buelo inougural di Caribbean Airlines for di Trinidad & Tobago pa Kòrsou. Durante e resepshon a hiba palabra, Minister di Desaroyo Ekonómiko sr. Kenneth Gijsbertha, Minister di Tráfiko, Transporte i Planifikashon Urbano sra. Zita Jesus-Leito, Minister di Turismo di Trinidad & Tobago sr. Randall Mitchell, Presidente di Caribbean Airlines Limited sr. Ronnie Mohammed i Director of Air Service Development and Tourism di Curaçao Airport Partners sra. Peggy Croes.

E buelonan di Caribbean Airlines lo keda efektuá dos biaha pa siman riba djabièrnè i djaluna for di Port of Spain. E buelonan ta ofresé konekshon ekselente pa i for di entre otro Barbados, Grenada, Guyana, New York i otro destinashonnan. E konekshonnan aki lo habri posibilidat pa Kòrsou risibí mas bishitante sea pa un biahe di negoshi òf plaser. Nos pais tin hopi pa ofresé; entretenementu, kultura, historia, arkitektura, playa, variedat di atrakshonnan turístiko i mas ku tur kos nos hendenan servisial. E servisio nobo di Caribbean Airlines ta hasi posibel pa mas turista bin eksperensiá e produkto ku Kòrsou ta brinda. Manera e kampaña di branding di Kòrsou ta bisa; ‘Sintié pa bo mes’.

E buelonan ta keda efektuá ku un boeing 737-800 ku un kapasidat di 150 stul. E skema di buelo lo ta di e siguiente manera:

Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH), Curaçao Industrial & International Trade Development Company (Curinde) i Curaçao Hospitality and Tourism Association (CHATA) ta felisitá Caribbean Airlines ku e buelo nobo i ta deseá nan tur kos bon.