…5% kresementu den turismo di estadia…
WILLEMSTAD – 27 di ougùstùs 2019 – Ofisina di Turismo di Kòrsou (CTB) ta raportá otro luna positivo den kresementu den kantidat di turista di estadia. E sifranan mas resien ta mustra un kresementu di 5% den turismo di estadia na luna di yüli 2019. Un total di 37.248 turista di estadia a keda registrá na yüli, un kantidat di 1.611 turista mas kompará ku yüli 2018.
Hulanda, e pais for di kual nos ta risibí mayoria turista di estadia a registrá 3% mas turista di estadia na yüli. Total 16.454 turista di estadia a keda risibí for di Hulanda. Alemania a presta hopi bon registrando 33% mas turista den luna di yüli. E buelo temporal for di Frankfurt ku Condor a terminá fin di luna di aprel i lo inisiá dia 3 di novèmber próksimo. Mientrastantu Europa kompletu a krese ku 4% produsiendo 19.727 turista na yüli.
E merkado di Nort Amérika a krese ku 3% na yüli 2019. Nos a yama bon bini na un total di 7.007 turista di estadia prosedente di Nort Amérika. No opstante e echo ku tabata tin ménos airlift for di New York i Charlotte kompará ku aña pasa, yegada for di Estádos Unidos a krese ku 4%. E kresementu positivo for di Estádos Unídos ta reflehá e demanda kontinuo for di e pais aki. CTB huntu ku su partnernan a keda promoshoná e kampaña di merkadeo “Curaçao: Feel It For Yourself” konsientemente, kual ta dunando resultado.
Turismo di estadia for di Sur Amérika ta sigui registrá un kresementu leve di 2% na yüli 2019. Airlift adishonal a hunga un papel importante den e kresementu registrá. Dia 11 di aprel último, Wingo a lansa su servisio di dos biaha pa siman for di Bogotá pa Kòrsou. Avianca na su turno ta operando 4 buelo adishonal pa siman for di Bogotá e aña aki den komparashon ku aña pasá. Tur e akshonnan aki a oumentá turismo di estadia for di Colombia. Un total di 2.289 bishitante a keda registrá for di Colombia, un kresementu di 26% den turista di estadia.
Region di Karibe a krese ku 18% na yüli. Total un kantidat di 3.724 turista di estadia a keda risibí. Aruba a registrá un kresementu di 4%, den sifranan apsoluto ta trata di 1.294 turista.
E kantidat total di anochi pa turista a krese ku 2% na yüli 2019. Total 362 mil anochi a keda registrá. Turistanan for di Europa a keda 246 mil anochi na Kòrsou kual ta igual na yüli 2018. Turistanan prosedente di ámbos Nort komo esnan for di Sur Amérika a keda respektivamente un kantidat di 49 i 43 mil anochi durante luna di yüli. Turistanan prosedente di region di Karibe a keda un total di 23 mil anochi na Kòrsou.
Turismo di estadia yanüari te ku yüli 2019
Turismo di estadia a krese ku 14% e promé 7 lunanan di 2019. Tur region menshoná a raportá kresementu. Total Kòrsou a risibí 275 mil turista di estadia di yanüari pa yüli 2019. For di Europa nos a risibí 142 mil turista na Kòrsou, un kresementu di 11%. For di Nort i Sur Amérika nos a risibí respektivamente 63 mil i 42 mil turista. Region di Nort Amérika a krese ku 11% miéntras Sur Amérika a krese ku 27%. Nos paisnan bisiña den Karibe a sòru pa 21 mil turista den e periodo aki kual ta un kresementu di 16%.
