WILLEMSTAD- 30 di ougùstùs 2019 – Resientemente a tuma lugá e Global Travel Marketplace (GTM) na The Diplomat Resort na siudat di Hollywood, Florida, Estádos Unídos. GTM ta un evento den kual ta konektá asesornan tòp den industria di biahe i turismo ku proveedónan di biahe global. GTM ta ofresé un plataforma na unda partisipantenan por mehorá nan produkto, konosementu, i fortifiká e laso ku proveedónan miéntras tin oportunidat di hasi kontaktonan nobo.
E aña aki tabata e promé bia ku Ofisina di Turismo di Kòrsou (CTB) a partisipá i a wòrdu kompañá pa Renaissance Curaçao Resort & Casino komo partner den sektor privá. Total, a kondusí 52 sita ‘one-on-one’ di 6 minüt kada un, den kual a topa ku agentenan di biahe ku tabata interesá di haña sa mas di nos destinashon. Durante di e ‘one-on-one’ a duna e agentenan di biahe informashon aktualisá di nos destinashon, atrakshonnan i paketenan di fakansi atraktivo pa e próksimo temporada. CTB ta konsiderá GTM un plataforma interesante pa promové Kòrsou, teniendo kuenta ku GTM ta ofresé agente di biahe ku ta buskando un produkto mas eksklusivo. Tabata alentador pa tuma nota ku hopi agente di biahe ku a aserká e delegashon di Kòrsou ya tabata konosé nos destinashon i a wòrdu aserká previamente dor di nan klientenan pa un reservashon. CTB ta kontinuamente en buska di plataforma- i kanalnan di benta nobo den kual por posishoná Kòrsou. Den e kaso di GTM, por bisa ku tabata un partisipashon eksitoso i ku ya ta dunando su frutanan.
