WILLEMSTAD- 3 di sèptèmber 2019 – Riba Dia Mundial di Turismo, 27 di sèptèmber 2019, Ofisina di Turismo di Kòrsou (CTB) den estrecho koperashon ku Ministerio di Desaroyo Ekonómiko (MEO), Curaçao Hospitality & Tourism Association (CHATA) i United Nations Development Programme (UNDP)lo organisá un Diálogo Demokrátiko dirigí riba Turismo. E Diálogo Demokrátiko ta un kontinuashon di e eksitoso National Tourism Conference 2018. Meta di e Diálogo Demokrátiko ta pa risibí idea ku lo por keda usá na momentu di formulashon di e Plan Stratégiko pa Desaroyo di Destinashon Turístiko dirigí riba Kòrsou. Durante un rueda di prensa resien, Minister di Desaroyo Ekonómiko, sra. Giselle Mc William, CEO di CTB sr. Paul Pennicook i Senior Advisor Strategy Development & Planning Dr. Dino Daal a splika e motibu, ophetivonan, format i programa di e Diálogo Demokrátiko.
CTB i su partnernan ta invitá komunidat pa partisipá na e Diálogo Demokrátiko dirigí riba Turismo. E format di e diálogo ta basá riba inklushon dunando oportunidat na sektor públiko i priva, organisashonnan no-gubernamental (NGO) i nos komunidat pa bini huntu i kompartí nan pensamentu riba turismo- un pila ekonómiko importante. Tin hopi interes pa e diálogo, registrá lihé pasó kuponan ta limitá. Pa mas informashon i registrashon bishitá https://www.curacaoinfo.org/tdd2019/
