WILLEMSTAD – 7 di òktober 2019– Awe 7 di òktober 2019 ta un fecha spesial pa mundu di aviashon; KLM ta selebrá 100 aña! Ofisina di Turismo di Kòrsou (CTB) i Curaçao Airport Partners (CAP) ta felisitá e kompania ku e logro memorabel aki. KLM ta e promé kompania di aviashon pa operá bou di e mesun nòmber, for di 1919. For di e tempu ei fundador di KLM, pionero riba tereno di aviashon i e promé CEO di e kompania, Albert Plesman tabatin un soño, “e oséano den aire ta uni tur hende” esta konektá tur hende di tur pais.
E impakto di KLM den ekonomia na Hulanda ta grandi; nan ta den e tòp 3 di empresanan privá na Hulanda. Pa nos aki na Kòrsou, KLM ta un partner importante konsiderando ku Kòrsou ta e aerolínea su destinashon di mas grandi den Karibe i na otro banda Hulanda ta e merkado ku ta pèrkurá pa mas tantu turista di estadia pa Kòrsou. Ken no a yega di mira un di e ‘jumbo jets’ di KLM baha na nos aeropuerto i keda kompletamente babuká di su presensia i magnitut?
Di akuerdo ku CEO di CTB, sr. Paul Pennicook “100 aña ta un logro eksepshonal i durante tur e añanan KLM a keda Kòrsou su partner di mas grandi. Kòrsou ta masha orguyoso di por ta un partner di KLM i ta felisitá e aerolínea i su empleadonan ku nan 100 aña di eksistensia. Masha Pabien i ban brinda riba otro siglo di éksito!” CEO di CAP, sr. Ralph Blanchard a indiká ku “CAP ta aploudí e logro maravioso di KLM pa a sobrebibí i prosperá durante 100 aña den e industria di mas eksigente i kompetitivo den komersio global. Banda di logra éksitonan individual riba tereno di aviashon, KLM tabata pionero den introdukshon di e fundeshi kreativo kual a stimulá e merkado grandi di konsumidó dor di introdusí su “Tourist Class” òf loke aworakí ta keda yamá “Economy Class”, kual ta e konsepto i produkto ku a hasi biahe global posibel pa e biahero averahe. Nos ta deseá KLM un siglo mas di éksito i ta enkurashá nan kreatividat kompetitivo”.
Rònt mundu tabatin selebrashon i Kòrsou tambe a formá parti di e festividatnan. Den un ambiente ameno a selebrá e logro di 100 aña KLM aki na Kòrsou tambe. Promé Minister di Kòrsou, sr. Eugene Rhuggenaath i Minister di Desaroyo Ekonómiko sra. Giselle Mc William tambe tabata presente pa e okashon spesial aki huntu ku partnernan den industria i demas invitadonan spesial. KLM su konosido avion ‘Queen of the Skies’ a kompletá e selebrashon. CTB i CAP ta spera di por sigui konta pa hopi aña mas ku buelonan diario entre Amsterdam, Hulanda i Willemstad, Kòrsou. Pabien!
