WILLEMSTAD – 21 di òktober 2019– Resientemente Ofisina di Turismo di Kòrsou (CTB) huntu ku Curaçao Airport Partners (CAP) a organisá un roadshow di 4 dia na Alemania pa informá agentenan di biahe aleman tokante tur loke Kòrsou tin di ofresé i tambe e posibilidat di konekshon aéreo ku Condor. Durante e roadshow a bishitá e siudat Zurich na Suisa i Nuremberg, Dresden i Potsdam na Alemania. Partnernan hotelero tambe tabata presente pa asina presentá nan hotèl na e agentenan di biahe. E aña aki e tema di e roadshow tabata “Curaçao goes Cinema”.
Un total di 220 agente di biahe a risibí informashon aktualisá di Kòrsou ku lo por yuda nan bende nos destinashon durante di e próksimo temporada. CTB a duna un introdukshon general di nos isla su diversidat siguí pa diferente entrevista ku partnernan hotelero i aerolíneanan- tur esaki den un ambiente di ‘cinema’. Tur presente a risibí un pòpkòrn presentá den un saku spesialmente diseñá den e branding di Kòrsou. E roadshow a inkluí tambe un marshe di informashon kaminda tur presente por a haña informashon i hasi pregunta riba e produkto ku Kòrsou ta ofresé. Pa komplementá, CAP a hasi introdukshon di nan VR goggles ku videonan 360 grado di Kòrsou. Tantu Condor komo KLM a pone algun ticket pa Kòrsou disponibel. E pakete di KLM a enserá ademas estadia grátis na Papagayo Beach Hotel i na Sunscape Curaçao Resort & Casino.
CTB i CAP ta gradisí; Acoya Curaçao Resort, Villas & Spa, AMResorts, Avila Beach Hotel, Condor, Corendon Hotels & Resorts, KLM Royal Dutch Airlines, Lions Dive Beach Resort, Oasis Coral Estate Beach Dive & Wellness Resort, Papagayo Beach Hotel & Resort, Renaissance Curaçao Resort & Casino, Santa Barbara Beach & Golf Resort Curaçao pa nan kolaborashon balioso.
