WILLEMSTAD – 24 di òktober 2019– Resientemente Ofisina di Turismo di Kòrsou (CTB) a kondusí un roadshow pa agentenan di biahe na siudatnan den área di New Jersey. E meta prinsipal tabata pa duna informashon di Kòrsou su produkto turístiko, akomodashonnan i tambe anunsiá e buelonan nobo nònstòp ku United Airlines for di Newark Liberty Airport entrante desèmber próksimo. CTB a kolaborá ku United Vacations, un divishon di Apple Leisure Group pa invitá agentenan di biahe tòp den industria. A presentá tambe ofertanan atraktivo unabes ku buk un buelo pa Kòrsou ku United Airlines. CEO di CTB, sr. Paul Pennicook tambe tabata presente pa e promé seshon i a yama e agentenan di biahe bon bini poniendo énfasis riba e importansia di traha huntu.
Huntu ku sektor privá a organisá 3 presentashon pa e agentenan di biahe den áreanan klave banda di Newark Liberty Airport. Na kada evento partnernan hotelero a topa ku e agentenan di biahe den un mini-tradeshow, siguí pa un presentashon un poko mas detayá di nos destinashon, aktividatnan, buelonan ku United Airlines i tambe e variedat di akomodashon ku nos ta ofresé. E agentenan no tabata únikamente di New Jersey, pero a konta tambe ku algun di Connecticut, New York i Pennsylvania.
CTB ta gradisí ACOYA Curaçao Resort, Villas & Spa, Avila Beach Hotel, Curaçao Marriott Beach Resort, Dreams Curaçao Resort, Spa & Casino, Papagayo Beach Resort, Renaissance Curaçao Resort & Casino, Santa Barbara Beach & Golf Resort Curaçao, Sunscape Curaçao Resort, Spa & Casino, Van Der Valk Kontiki Beach Resort pa nan partisipashon. Ta sigur ku por mira bèk riba un eksitoso roadshow na New Jersey i un tremendo introdukshon di United Airlines riba itinerario di buelonan pa Kòrsou.
