WILLEMSTAD – 14 di novèmber 2019 – Inspirá pa nos propio distrito di arte floresiente, Ofisina di Turismo di Kòrsou (CTB) a pèrkurá pa sensashon na Miami ku un mural grandísimo den kurason di Wynwood. Durante di e último 2 añanan street art a bin ta krese inmensamente den nos sentro di siudat Willemstad. Den kuadro di esaki CTB, i su agensia di relashonnan públiko pa Nortamérika, Diamond PR, a hasi un petishon na nos artista lokal, Sander van Beusekom, pa diseñá i pinta un mural original ku lo keda estrená na Wynwood den antisipashon di Art Basel 2019. E evento ta trese anualmente mas di 40.000 bishitante i figuranan públiko, esaki adishonal na e tráfiko diario di hende na pia den e área floresiente.
E mural di40′ x 18′ (12 meter x 5.5 meter) ta forma parti di e kampaña mundial di branding di Kòrsou. E kolónan vibrante, e kaleidoskop di mandarin, e kolo hel di solo, e blou di shelu, índigo i fuchsia ta basá direktamente riba e estilo di estétika di CTB. E elementonan gráfiko ta representá e mihó ku Kòrsou tin di ofresé, for di su habitantenan amabel te na su bida marítimo. E arte titulá “Tickle Me Curaçao”, ta representá un dama yu di Kòrsou ku ta kishikí e barika di un ‘parrotfish’, un piská ku kolónan di arko íris ku ta biba den un di nos mas ku 65 sitionan di buseo. Un bista mas serka na e mural ta revelá un trasfondo ku ta reflehá nos edifisionan históriko i nos brùg Juliana, e brùg di mas haltu den Karibe. E tononan blou den trasfondo i e dama su ganashi den forma di strea ta un aksènt adishonal na islanan ABC i nos bandera.
Sander van Beusekom ta un di e fundadónan di Street Art Skalo, i un di e diferente artistanan di Kòrsou ku a supla rosea pa un bida nobo den Scharloo i Pietermaai, pintando muralnan grandi den nos kayanan. E ta konosí pa su mural di e tata i e yu piskando, kual ta ubiká patras di Curaçao Maritime Museum. “Tur dia di nobo mi ta sinti mi inspirá pa habitantenan di Kòrsou, pa e kolónan i e beyesa natural di nos isla i semper mi a sinti mi yamá pa mustra e aspektonan ei den mi arte”, di akuerdo ku van Beusekom. “ Ku mi tin e oportunidat pa krea un mural di Kòrsou i pone nos destinashon riba esenario mundial ta algu ku únikamente mi a tribi di soña”.
Ku e meta pa sigui promové nos destinashon den e parti sur di Florida, un di e merkadonan mas grandi pa Kòrsou, CTB a organisá un evento na e mural dia 12 di novèmber último. A invitá tòp periodistanan di e área sur di Florida, representando publikashonnan di biahe i estilo di bida, pa sera konosí ku van Beusekom i sr. Paul Pennicook, CEO di CTB, ku tambe tabata presente. Huntu nan a pone e tokenan final na e mural. Despues di un seshon interaktivo di pintamentu, prensa por a disfrutá di algun pasaboka outéntiko di Kòrsou i kombersá ku representantenan di Kòrsou riba e destinashon, e último novedatnan i desaroyonan di nos isla.
“Semper nos ta buska maneranan kreativo pa amplia nos strategianan di merkadeo”, esaki di akuerdo ku sr. Pennicook. “Danki na e transporte aéreo nònstòp ku American Airlines for di Miami International, sur di Florida semper a resultá un di nos tòp merkadonan. Pa motibu di esaki, kombiná nos arte lokal floresiente ku un di Miami su eventonan di arte mas prominente, tabata un eskoho lógiko.”
Van Beusekom a kuminsá traha riba “Tickle Me Curaçao” den kuminsamentu di luna di Novèmber. E mural lo keda ekshibí durante di Art Basel 2019, di 5 pa 8 di desèmber i lo keda visibel despues pa bishitantenan di Miami te ku fin di yanüari. Amantenan di arte ku ta interesá di siña mas di nos destinashon por scan e QR code parti abou di e mural.
