WILLEMSTAD- 7 di desèmber 2019 – Bon bini na United Airlines! E buelo inougural di United Airlines ta marka regreso di e aerolínea na Kòrsou despues di kasi un dékada. Ku regreso di United Airlines, awor Kòrsou por akomodá más bishitante for di Nort Amérika.Den un ambiente ameno na Aeropuerto Internashonal Hato a tuma lugá selebrashon di e buelo inougural di United Airlines for di Newark, New Jersey pa Kòrsou. Durante e resepshon a hiba palabra, Minister di Tráfiko, Transporte i Planifikashon Urbano sra. Zita Jesus-Leito, Senior Manager International Network Planning di United Airlines sra. Jessi Grewal, CEO di Curaçao Tourist Board sr. Paul Pennicook, Director of People & Communications di Curaçao Airport Partners sra. Narayana Camelia i CEO di Curaçao Hospitality & Tourism Association sr. Miles Mercera.
Sr. Pennicook a kompaña sra. Grewal riba e promé buelo pa Kòrsou despues di a atendé e seremonia ku a tuma lugá na Newark Liberty International Airport. Tur pasahero riba e promé buelo, tantu e buelo ku a sali for di Newark ku destinashon Kòrsou komo e buelo ku a sali di Kòrsou pa Newark a risibí un sertifikado konmemorativo firmá pa CEO di e aerolínea. E buelo direkto di United Airlines pa Kòrsou lo keda efektuá riba tur djasabra saliendo Newark Liberty International Airport mainta 8:33 i lo yega Kòrsou pa 2:30 di mèrdia. E buelo di regreso lo sali Kòrsou pa 3:30 mèrdia i lo aterisá na Newark Liberty International Airport pa 7:35 anochi. E buelonan ta keda efektuá ku un boeing 737 ku un kapasidat di 126 stul. E servisio nobo di United Airlines ta hasi posibel pa mas turista bin eksperensiá e produkto úniko ku Kòrsou ta brinda. Nos playanan bunita, kultura riku, historia, arkitektura, variedat di atrakshonnan turístiko, entretenementu i mas ku tur kos nos hendenan amabel.
E konekshon direkto ku Newark ta un logro importante pa Kòrsou den e esfuersonan pa sigui krese airlift for di e merkado di Estádos Unídos. Na mes momentu e ruta aki ta brinda tambe mas opshon di biahe pa nos pueblo lokal. Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality and Tourism Association (CHATA) ta felisitá United Airlines ku e buelo nobo i ta deseá nan tur kos bon.
