WILLEMSTAD – Desèmber 19, 2019 – Dia 19 di desèmber último durante un resepshon ameno na Lanthùis Chobolobo, Ofisina di Turismo di Kòrsou (CTB) a hasi desvelo di su year planner i agènda pa aña 2020. Tur aña di nobo komo parti di e kampaña di konsientisashon ‘Kòrsou ta Dushi’, ta skohe pa dediká e year planner na un tema ku ta inspirá i konsientisá nos komunidat. Pa aña 2020 a skohe pa honra 12 baluarte di Kòrsou pa nan aporte kontinuo na nos komunidat. E 12 baluartenan ku a keda honrá ta: Gilbert “Gibi” Bacilio, Anselmus “Boy” Dap, Filomena “Elia” Isenia, Hubert “Yubi” Kirindongo, Diana Lebacs, Benedicto “Beno” Martis, Eligio Melfor, Rina Penso, Serapio “Shapo” Pinedo, Norman “Rudy” Plaate, Eric Wederfoort i Benjamin “Shon Benchi” Wefer. Tantu e year planner komo e agènda ta inkluí potrèt i un mensahe kòrtiku di kada baluarte.
Durante di e resepshon CEO di CTB sr. Paul Pennicook a hasi entrega di un plakat di rekonosementu na kada baluarte komo muestra di apresio pa e talento desplegá riba nan tereno spesífiko. Ta trata di talentonan manera entre otro, deklamá, músika, poesia, sambuyá, krea arte, skibi buki i aktua. “E biahero di awendia, spesialmente esnan for di e arianan friu no ta bishitá e region aki solamente pa nos temperatura i playanan bunita… pero pa muchu mas, entre otro kultura, historia i herensia. E bishitante ta biaha pa eksperensiá e destinashon. Loke boso ta hasi por medio di boso talento ta enrikesé e eksperensia di Kòrsou,” asina sr. Pennicook a indiká.
CTB ta felisitá kada baluarte. Danki pa bo aporte na desaroyo sosial i ekonómiko di nos pais, Kòrsou!
