9% kresementu den turismo di estadia
WILLEMSTAD – 30 di desèmber 2019 – Ofisina di Turismo di Kòrsou (CTB) ta raportá un subida di 1% den kantidat di turista di estadia pa luna di novèmber 2019. Un kantidat total di 38.158 turista a keda risibí hibando e total di turista di estadia aworakí na 419.125 kual ta 9% mas ku aña pasá.
E region for di kual nos ta risibí mayoria turista di estadia kual ta Europa, a krese ku 14% na novèmber. Miéntras turismo di estadia for di region Karibe a krese ku 20% na luna di novèmber. E merkado di Nort Amérika a registrá un bahada di 15% pa motibu di ménos airlift, miéntras Sur Amérika a baha ku 23% primordialmente dor ku e frontera ku Venezuela ta será miéntras aña pasá na e mesun temporada aki e tabata habrí. E kresementu signifikante registrá for di Europa i region di Karibe por keda atribuí direktamente na e oumento den kantidat di buelo for di Amsterdam i tambe komienso di e servisio di dos buelo pa siman for di Port of Spain ku Caribbean Airlines. For di Hulanda, Kòrsou a risibí 16.787 bishitante ku ta konta pa un kresementu di 17%. E kantidat di turista prosedente di Trinidad & Tobago a dòbel na luna di novèmber 2019.
E kantidat total di anochi pa turista a registrá un kresementu di 3% na novèmber 2019. Total 327 mil anochi a keda registrá. Turistanan for di Europa a keda 222 mil anochi na Kòrsou kual ta un subida di 12% den kantidat di anochi pa turista. Turistanan prosedente di Nort Amérika i di Sur Amérika a keda respektivamente un kantidat di 45 i 39 mil anochi durante luna di novèmber. Turistanan prosedente di region Karibe a keda un total di 16 mil anochi na Kòrsou.
Turismo krusero – CPA
E sifranan di novèmber 2019 ta mustra ku 38 barku krusero a keda risibí na e puerto na Willemstad kompará ku 36 barku krusero e mesun luna na 2018. Esaki ta un subida di 6%. Un total di 92.235 pasahero krusero a keda risibí na novèmber 2019, esaki ta 7.776 pasahero (9%) mas ku e mesun luna na 2018.
Sifranan yanüari te ku novèmber 2019
Turismo di estadia, di yanüari pa novèmber a krese ku 9%. Den sifranan apsoluto ta trata di un total di 419 mil turista di estadia.
Turismo krusero, di yanüari pa novèmber a krese ku 3%. Den sifranan apsoluto ta trata di un total di 681 mil turista krusero.
E kantidat total di turista ku a bishitá nos país, di yanüari pa novèmber a krese ku 5%, den sifranan apsoluto ta trata di 1.1 mion turista.
