…Sifranan preliminar yüli 2020…
WILLEMSTAD- 5 di ougùstùs 2020 – Ofisina di Turismo di Kòrsou (CTB) ta raportá yegada di 8.195 turista di estadia desde reapertura di frontera dia 1 di yüli 2020. 83% di e kantidat di turista registrá ta prosedente di Europa i 11% a bini for di region Karibe.
Ku nos frontera habrí te na e momentunan aki, pa solamente algun pais den Wèst Europa, por mira ku 93% di e europeonan ku a bishitá Kòrsou ta prosedente di Hulanda. Sobrá a bini for di Alemania i Bèlgika. Un total di 55% di e europeonan aki a keda na un akomodashon alternativo miéntras 45% a keda den hotèl.
For di region Karibe te na e momentunan aki, Kòrsou a risibí 907 turista di estadia. Bishitantenan for di otro islanan den Reino Hulandes tambe por bishitá Kòrsou. Un total di 477 turista di estadia a keda risibí for di Bonaire, 328 for di Aruba i un total di 93 for di St. Maarten. CEO di CTB, Paul Pennicook a remarká, “tabata bon pa tuma nota ku mas di 8000 turista di estadia a hasi nan yegada na luna di yüli. E promé luna kompletu despues di reapertura di frontera. E reservashonnan pa luna di ougùstùs te na e momentunan aki ta mustra prometedor”.
