WILLEMSTAD- 1 di òktober 2020 – Resientemente Ofisina di Turismo di Kòrsou (CTB) ku ta enkargá ku maneho diario di e Área di Rekreo Marie Pampoen a introdusí e sistema di aplikashon online pa por hasi uzo di e área pa aktividatnan sosial. Entrante promé di òktober 2020 tur petishon mester keda hasí via www.mariepampoen.cw pues no ta posibel mas pa hasi petishon personal na CTB.
Riba e wèpsait por haña tur informashon pa por apliká pa hasi uzo di e área. Importante pa lesa tur e reglanan i apliká tur e protokòlnan di distansia físiko i higiena. Tuma nota ku na momentu ku ta bai hasi uzo di e área mester tene kuenta ku e reglanan stipulá pa Gobièrnu di Kòrsou relashoná ku entre otro aglomerashon na lugánan públiko.
CTB ke sigui brinda nos komunidat e oportunidat pa di un forma responsabel i alabes kumpliendo ku e reglanan stipulá pa Gobièrnu di Kòrsou hasi uso di e Área di Rekreo Marie Pampoen. E área ta unu bunita kaminda alabes hopi persona ta bai pa hasi moveshon físiko, pa esaki sí no mester yena un aplikashon online. Ban sigui kuida i mantené e área.
