…19 kliente di SOAW a terminá e kurso ku éksito…
WILLEMSTAD – 30 di òktober 2020 – Resientemente un grupodi 19 kliente di Ministerio di Desaroyo Sosial, Labor i Bienestar (SOAW) a konkluí un kurso pa duna masashi na turista. E kurso a keda ofresé pa Ofisina di Turismo di Kòrsou (CTB) den estrecho koperashon ku SOAW, Ministerio di Desaroyo Ekonómiko (MEO) i Curaçao Tropical Spa. Entrega di sertifikado na e partisipantenan a tuma lugá na Academy Hotel Curaçao den presensia di Minister di Desaroyo Ekonómiko Dr. Steven Martina i Minister di Desaroyo Sosial, Labor i Bienestar, sr. Hensley Koeiman.
Banda di e parti teorétiko e kursistanan a siña téknikanan di duna masashi ku produktonan natural manera entre otro kalbas. Tambe e kurso a inkluí e modulo di servisio na kliente, maneho di finansa, merkadeo i entrepreneurship. E seshon di entrepreneurship a proveé e kursistanan e hèrmèntnan nesesario pa por lanta nan propio negoshi den futuro. E kurso a inisiá na komienso di e aña aki i e parti final a keda konkluí di forma virtual na luna di sèptèmber último. Ademas di e sertifikado di Curaçao Tropical Spa e kursistanan a risibí tambe un sertifikado di e instituto Carmen Llanos-Ali Tajan, un instituto di training na Colombia kual a traha huntu ku Curaçao Tropical Spa na e parti di sertifikashon di e kurso di masashi.
CTB, SOAW i MEO ta deseá e kursistanan tur klase di éksito pa futuro.
