WILLEMSTAD- 5 di mart 2021 – Resientemente Ofisina di Turismo di Kòrsou (CTB) a tuma nota di publikashonnan ku a sali na Merka refiriendo na e echo ku Kòrsou ta riba e lista di alerta di Sentro pa Kontròl di Malesa i Prevenshon (CDC) riba nivel 4. Aunke e notisia aki a keda publiká dia 1 di mart último, na Merka mester bisa ku no ta trata di un desaroyo nobo ni ku e sirkunstansianan aktual a deteriorá mirando ku Kòrsou ya kaba tabata riba e lista di alerta di CDC na nivel 4 for di aña pasá na luna di novèmber. Kòrsou meskos ku hopi otro pais den region Karibe ta kompartí e mesun nivel di alerta riba e lista di CDC. CTB i partnernan den sektor privá ta tuma e echo ku e notisia aki a bolbe keda publiká resientemente komo algu hopi serio mirando ku e por tin konsekuensianan negativo pa loke ta trata e kantidat di reservashon di biahe pa Kòrsou for di Merka.
E restrikshon di biahe pa biaheronan prosedente di e estadonan na Merka a keda eliminá pa Gobièrnu di Kòrsou for di 1 di yanüari último. For di e momentu ei e merkado a kuminsá mehora gradualmente konsiderando e airlift aktual for di e merkado aki. Na momentu ku CTB a tuma nota di e informashon ku a sali den media na Merka a tuma kontakto ku e media ku a saka e informashon aki pa diskutí e echo aki kuné i tambe presente e informashon aktual. Banda di esaki, a saka un deklarashon pa e partnernan den industria di biahe na Merka kaminda a informá nan di e echo ku Kòrsou pa e último 28 dianan a mantené un “positivity rate” di ménos ku 3%. Ademas e deklarashon ta kubri tambe e programanan ku CTB ta implementá ku tantu e bishitante i e pueblo lokal komo enfoke. Tambe e echo ku ta brinda transparensia kompletu i ku riba un base kontinuo ta aktualisá e wèpsait www.curacao.com ku e último informashon referente biahe pa Kòrsou. Ademas a menshoná ku CTB ta publiká e esfuersonan ku Kòrsou ta hasi referente distansiamentu físiko, protokòl pa ku entrada i e medionan ku e turista tin na su disposishon pa por haña informashon. Tambe e echo ku hotèlnan, restorantnan i atrakshonnan turístiko na Kòrsou tur a adaptá nan produkto pa esaki por keda kumpli ku e nesesidatnan di e biahero di awendia.
CTB lo sigui vigilá e situashon i lo tuma kualke akshon nesesario pa por mitigá posibel efekto riba reservashon di biahe pa Kòrsou den futuro.
