WILLEMSTAD- 10 di mart 2021 – Ofisina di Turismo di Kòrsou (CTB) ta raportá un kantidat di 8.144 turista di estadia pa luna di febrüari. Esaki ta un subida kompará ku luna di yanüari. E sifranan ta indiká un oumento leve den kantidat di turista prosedente di Hulanda apesar di e konseho di biahe negativo anunsiá pa Gobièrnu Hulandes. E kantidat di bishitante risibí na luna di febrüari ta similar na e kantidat risibí na yüli 2020 na momento ku a kuminsá suavisá e restrikshonnan di biahe introdusí pa motibu di e pandemia Covid-19.
Pa luna di febrüari un kantidat di 5.179 turista hulandes a keda risibí kual ta 71% ménos ku na febrüari 2020. For di Alemania un total di 372 turista a keda registrá. Resientemente gobièrnu aleman a kita e konseho di biahe negativoanunsiá pa Kòrsou, pa e motibu aki ta antisipá un perspektiva faborabel pa loke ta trata e kantidat di turista for di Alemania na luna di mart. Na luna di febrüari, solamente 40% di e turistanan prosedente for di Europa a keda den un ‘resort hotel’ (esta hotèl chikí, grandi i bùngalo). Durante e lunanan anterior 55% a keda den un ‘resort hotel’, pues esaki tambe ta un di e konsekuensianan mas di e konseho di biahe negativo di Hulanda.
For di Estádos Unídos un kantidat di 1.095 turista a keda risibí na luna di febrüari. E kantidat di bishitante for di Estádos Unídos ta moviendo den e direkshon positivo. E merkado ta rekuperando tiki tiki awor ku ta risibí turista for di tur estado. For di region di Sur Amérika un total di 279 turista a keda risibí. Un total di 53% di e bishitantenan risibí for di Sur Amérika ta prosedente di Colombia. For di region Karibe, Kòrsou a risibí 450 turista di estadia na febrüari, primordialmente for di e islanan den Reino Hulandes.
CEO di CTB, Paul Pennicook a remarká, “ta sigur alentador pa mira e sifranan di kantidat di turista for di Estádos Unídos desaroyando den e direkshon positivo. Na mes momentu Gobièrnu di Kòrsou i tur otro sektor den e industria ta kontinuá ku e esfuersonan pa logra ku for di Hulanda ta pone Kòrsou bèk riba kódigo hel”.
