WILLEMSTAD- 20 di mei 2021 – Resientemente Ofisina di Turismo di Kòrsou (CTB) a organisá un seminario interaktivo riba e merkado di Nort Amérika. Invitadonan na e seshon aki tabata miembronan di CHATA i CASHA. E seshon tabata na enkargo di Paul Pennicook, CEO di Ofisina di Turismo di Kòrsou (CTB). Meta prinsipal di e seshon aki tabata pa pone énfasis riba importansia di e merkado di Nort Amérika i kon por oumentá e kantidat di bishitante for di e merkado aki huntu komo Kòrsou. E seshon a konta ku partisipashon di 23 partner den industria di turismo.
Durante e presentashon sr. Pennicook a presentá e kantidat total di turista di estadia na aña 2018, 2019 i e promé 2 lunanan di 2020. E kantidat di turista di estadia for di Nort Amérika ta kresiendo gradualmente registrando un kresementu di 24% durante luna di yanüari i febrüari 2020 kompará ku e mesun lunanan na 2019. E kresementu aki por keda atribuí na kambio grandi den uso di e diferente medionan di reservashon. Aki ta trata prinsipalmente di e kambio di agensianan di biahe online (OTA’s) pa reservashonnan hasí via operadornan di tour, agensianan di biahe (retail) i reservashonnan ku ta keda hasí dirèkt serka e propiedat mes. E forma di reservashon ku a demostrá e kresementu mas grandi ta agensianan di biahe (retail) kual ta un resultado direkto di akshon stratégiko di CTB pa eduká i sostené agentenan di biahe na un manera mas mihó. Thijs van der Valk di Baoase Luxury Resort a kompartí nan best practices komo resòrt pa loke ta trata e merkado di Nort Amérika.
Mas aleu durante e seshon interaktivo sr. Pennicook a presentá e aktividatnan i akshonnan referente e área di trade ku ta tumando lugá aktualmente na Nort Amérika. Akshonnan manera entre otro, co-op campaigns, kampaña di merkadeo huntu ku aerolíneanan, webinars, ferianan virtual, e-blast, publikashonnan pa agentenan di biahe i kombersashon kada 2 siman ku partnernan den área di trade. Adishonalmente, e aktividatnan di merkadeo i PR ku a keda ehekutá den e merkado di Nort Amérika ta inkluí kampañanan di publisidat digital, bishita di periodistanan i influencers i ahust’é den e mensahenan di avisonan ku e meta pa atraé e biahero nobo.
CTB ta enkurashá partnernan den industria di turismo pa hasi uso di tur e medionan disponibel pa por generá reservashon pa asina krese nan kompania. CTB lo traha huntu ku partnernan internashonal pa amplia e representashon di kompanianan turístiko lokal den nan programanan. Na final di e seshon CTB, CHATA i CASHA a kumbiní pa sigui kolaborá pa huntu promové nos destinashon. Di akuerdo ku sr. Pennicook, “dor di pone énfasis riba tur loke ku ta hasi Kòrsou úniko, huntu nos por sòru pa un kresementu signifikante den kantidat di turista ku ta bishitá nos for di e merkado di Nort Amérika”.
