WILLEMSTAD- 29 di sèptèmber 2021 – Resientemente Ofisina di Turismo di Kòrsou (CTB) a organisá dos seminario bou di e nòmber ‘E futuro di turismo ta AMI!’ ku e meta pa ekipá taksistanan ku e hèrmèntnan nesesario pa por duna servisio di kalidat na e turistanan ku ta skohe pa bishitá nos pais. Taksistanan ta forma parti importante di e kadena di servisio ku ta keda duná na nos turistanan. Riba base regular CTB sa organisá seminarionan i seshonnan informativo pa ‘frontliners’ den turismo mirando e ròl importante ku kada unu tin den e manera kon e turista ta eksperensiá e totalidat di e produkto turístiko. Pa e dos promé seminarionan a skohe pa konsentrá riba e grupo di taksistanan.
Minister di Desaroyo Ekonómiko, sr. Ruisandro Cijntje a kompartí palabranan di enkurashamentu ku e partisipantenan ku tabata presente den e promé seshon, miéntras CEO di CTB sr. Paul Pennicook a hiba palabra durante e di dos seshon kaminda e tambe a motivá e partisipantenan konsiderando e ròl importante ku kada unu tin komo ‘frontliners’ den e industria di turismo. Un total di 72 taksista a partisipá na e seminarionan. Pa e partisipantenan e seminario aki a ofresé un tremendo oportunidat pa nan sigui desaroyá nan abilidatnan i siña aspektonan nobo pa alsa e nivel di servisio na nos turistanan. E seminario a keda diseñá pa Nostra Growth.
E partisipantenan a inkluí representantenan di Sindikato Uní di Shofùr di Taxi (SINUSTA), Thirty Steps Association (TSA), Luxury Taxi Services Curaçao i Sindikato Transporte Optimalisa (STO). CTB ta gradisí tur partisipante pa nan partisipashon aktivo na e seminario i ta konta ku nan lo bai hasi bon uso di e konosementu atkerí den nan trabou diario.
