WILLEMSTAD- 3 di desèmber 2021 – Den un ambiente ameno na Aeropuerto Internashonal Hato a tuma lugá selebrashon di e buelo inougural di EZ Air su ruta nobo, Kòrsou – Medellín. E buelo inougural aki ta marka inisio di e di 2 siudat den Colombia ku ta forma parti di e skema di buelo di e aerolínea. E buelo pa i for di Medellín lo ta dos biaha pa siman. E buelonan ta keda efektuá ku un SAAB-340 ku un kapasidat di 34 stul. Durante e resepshon a hiba palabra, Minister di Desaroyo Ekonómiko, Ruisandro Cijntje, Minister di Tráfiko, Transporte i Planifikashon Urbano, Charles Cooper, CEO & Director Flight Operations di EZ Air, René Winkel i Director of Air Service Marketing & Development na Curaçao Airport Partners, Peggy Croes.
E ruta nobo di EZ Air ta hasi posibel pa mas turista for di Colombia bin eksperensiá e produkto úniko ku Kòrsou ta brinda. Nos playanan bunita, kultura riku, historia, arkitektura, variedat di atrakshonnan turístiko i mas ku tur kos nos hendenan amabel. Na mes momentu e ruta aki ta brinda tambe mas opshon di biahe pa nos pueblo lokal mirando ku awor banda di e siudat Barranquilla e aerolínea EZ Air ta bula tambe pa e siudat di Medellín.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP) i Curaçao Airport Holding (CAH) ta felisitá EZ Air ku nan destinashon nobo i ta deseá nan tur kos bon.
