esta promé ku pandemia
WILLEMSTAD- 10 di desèmber 2021 – Ofisina di Turismo di Kòrsou (CTB) ta raportá un kantidat di 37.447 turista di estadia pa luna di novèmber. Ku e kantidat di turista di estadia aki, luna di novèmber 2021 a yega na 98% di e kantidat registrá na novèmber 2019 esta promé ku pandemia. Na novèmber 2019 un total di 38.159 turista di estadia a bishitá Kòrsou. Kòrsou a bolbe registrá un kantidat rèkòrt di turista for di Hulanda, un total di 23.024 turista hulandes a keda risibí na novèmber 2021. Pa di sinku luna konsekutivo e kantidat di turista risibí for di Hulanda na 2021 a surpasá e kantidat di turista hulandes risibí den e mesun luna na 2019.
Na novèmber, un kantidat di 26.104 turista di estadia a bishitá Kòrsou for di Europa. For di Hulanda nos a risibí 23.024 turista, 1.215 for di Alemania i 523 for di Bèlgika. Informashon kompilá for di e karchinan di imigrashon ta mustra ku turistanan europeo a keda un averahe di 11.2 anochi na luna di novèmber 2021. Miéntras na novèmber 2019 e averahe di anochi tabata 9.3. Di e turistanan europeo, 56% a keda den un ‘resort hotel’ (esta hotèl grandi, chikí i bùngalo) na luna di novèmber.
For di Estádos Unídos un kantidat di 4.456 turista a bishitá Kòrsou na luna di novèmber di kual 70% a keda den un ‘resort hotel’. E turistanan aki a keda un averahe di 7.3 anochi miéntras e mesun luna na 2019 turistanan prosedente di Estádos Unídos a keda 6.8 anochi. For di region di Sur Amérika un total di 3.598 turista di estadia a bishitá Kòrsou, 46% tabata prosedente di Colombia miéntras 20% tabata prosedente di Brazil. For di Karibe un total di 1.623 turista di estadia a keda risibí na novèmber. Mayoria di e turistanan aki ta prosedente di e paisnan den Reino Hulandes.
Na luna di novèmber un total di 29 barku krusero a bishitá nos pais ku un total di 41.280 turista krusero. “E prestashon realisá na luna di novèmber ta e mihó prestashon desde ku a kita e restrikshonnan di biahe. Un biaha mas esaki ta demostrá kon resiliente nos industria di turismo ta. Ku kasi 37.500 turista di estadia na luna di novèmber nos por anunsiá ku orguyo ku nos industria di turismo ta sigui progresá no opstante e situashon aktual. E esfuerso kolektivo di stakeholders lokal huntu ku nos partnernan internashonal den nos merkadonan prinsipal a sòru pa luna di novèmber tabata eksitoso. Banda di esaki, Kòrsou a risibí un kantidat total di 222.715 turista di estadia durante e promé 11 lunanan di aña 2021”, asina CTB a remarká.
