ku partisipashon di riba 150 partner den turismo for di rònt mundu
WILLEMSTAD- 24 di mei 2022 – E siman aki, riba 150 mayorista, aerolínea i prensa tei presente na Kòrsou pa partisipá na ‘Curaçao Global Trade Symposium 2022’. Ta trata aki di un simposio organisá spesialmente pa mayoristanan prosedente di diferente parti di mundu bin eksperensiá e produkto turístiko úniko ku Kòrsou tin di ofresé na bishitantenan for di eksterior i tambe kondusí reunionnan ku partnernan di sektor privá. Durante di e simposio lo kompartí tambe Kòrsou su senario di airlift pa aña 2022, e desaroyonan riba tereno di akomodashon, e kresementu den kantidat di turista di estadia i nos plannan pa futuro.
Ofisina di Turismo di Kòrsou (CTB), Curaçao Hospitality and Tourism Association (CHATA) huntu ku diferente partner den sektor privá a uni pa realisashon di e simposio importante aki despues di 2 aña di ousensia. E simposio a inisiá ku un tremendo resepshon dia 23 di mei atardi inkluyendo un mini Karnaval i parada di Seú pa asina laga e mayoristanan sinti un tiki di e kultura di nos dushi Kòrsou. E apertura ofisial a tuma lugá dia 24 di mei i a inkluí spich di Minister di Desaroyo Ekonómiko, sr. Ruisandro Cijntje, direktor athunto di CTB sr. Hugo Clarinda i sra. Maria-Helena Seferina-Rojas, Managing Director di CHATA. Despues di e parti ofisial, mayoristanan i representantenan di e aerolíneanan presente a topa di forma individual ku representantenan di sektor priva di CHATA durante e seshon di Marketplace. Dia 25 di mei lo tin seshonnan individual na enkargo di representantenan di CTB kaminda lo diskutí ku e mayoristanan e strategianan i e plannan di akshon pa e region di Europa, Nort Amérika, Sur Amérika i Karibe.
E programa di e ‘Curaçao Global Trade Symposium’ a inkluí tambe bishita na diferente akomodashon eksistente, proyektonan nobo i bishita na diferente playa riba nos pais. Lo klousurá e simposio ku un ‘Willemstad Farewell Street Party’ den Otrobanda pa asina yama danki na e mayoristanan pa nan partisipashon i kompromiso pa ku e produkto turístiko ku Kòrsou ta ofresé.
‘Curaçao Global Trade Symposium 2022’ ta konta ku partisipashon di representantenan for di Estádos Unídos, Canada, Hulanda, Alemania, Bèlgika, Polonia, Fransia, Colombia, Brazil, Argentina, Chile, Ecuador, México, Panamá, Paraguay, Uruguay, Perú, Venezuela, Sürnam, Trinidad & Tobago, Jamaica i St. Maarten.
