WILLEMSTAD- 5 di ougùstùs 2022 – For di siman pasá te ku medio sèptèmber, un total di 12 buelo charter a ser programá pa sali for di Quito, Ecuador ku un stòp kòrtiku na Guayaquil, i kontinuando nònstòp pa Kòrsou. Komo resultado di esaki, un kantidat di posiblemente 1.600 bishitante ekuatoriano lo yega na aeropuero di Kòrsou durante e periodo akí.
E buelonan ta keda ehekutá den kooperashon estrecho ku Ofisina di Turismo di Kòrsou (CTB), den kolaborashon ku e mayoristanan Maxi Travel, Mas Travel Ecuador, Dream & Travel Ecuador, Golden Vacations i Castillum Travel. CTB ta masha satisfecho ku tin hopi interes pa e buelonan charter akí. E buelonan ta ser operá pa Aeroregional Ecuador ku un avion nobo Boeing 737-400 di 145 asiento.
E merkado di Ecuador tin e potensial pa krese i trese mas bishitante pa Kòrsou. Pa e motibu aki CTB huntu ku un grupo selekto di hotèlnan partner, ta organisando kontinuamente seminarionan dirigí riba benta i webinars edukashonal pa agentenan di biahe, i ta ehekutá promoshonnan digital huntu ku kampaña via medionan sosial pa alkansá nos públiko deseá na Quito, Guayaquil i Cuenca.
