WILLEMSTAD – 17 di òktober 2022 – Ofisina di Turismo di Kòrsou (CTB) ta raportá ku Kòrsou a risibí un total di 355.661 turista di estadia durante e promé 9 lunanan di aña 2022 kual ta un rekuperashon di 103% kompará ku e mesun periodo na 2019. Na 2019 e kantidat registrá durante e mesun periodo tabata 346.464. Basá riba e informashon aki CTB por anunsiá ku orguyo ku e sifranan di turismo di estadia ku nos tabata konosé promé ku pandemia a keda rekuperá kompletamente. Ku gran plaser Kòrsou lo alkansá na final di e aña aki e kantidat total di turista di estadia realisá na aña 2019 i asta lo por registrá un kantidat rèkert di turista di estadia si e situashonnan aktual permanesé.
Prestashon sèptèmber 2022
CTB ta raportá un kantidat di 37.229 turista di estadia pa luna di sèptèmber. Ku e kantidat aki, luna di sèptèmber 2022 a rekuperá 115% di e kantidat di turista di estadia registrá na luna di sèptèmber 2019 esta promé ku pandemia, na momentu ku un kantidat di 32.510 turista di estadia a keda risibí. Kòrsou ta konta ku un tremendo prestashon di e 3 merkadonan prinsipal esta; Hulanda, Estádos Unídos i Colombia. E 3 merkadonan aki huntu ta responsabel pa 71% di tur turista di estadia ku a bishitá Kòrsou durante sèptèmber 2022. Un kantidat di 64.2% di tur e turistanan ku a bishitá Kòrsou a skohe un ‘resort hotel’ (esta hotèl grandi, chikí i bùngalo) komo akomodashon. Solamente 38.8% a keda den un akomodashon alternativo. Un averahe di 9.5 anochi pa bishitante a keda registrá na luna di sèptèmber.
Europa ta keda e region mas fuerte pa Kòrsou. Na sèptèmber, un kantidat di 19.087 turista di estadia a bishitá Kòrsou for di Europa. Esaki ta 51.3% di e kantidat total di turista di estadia ku a bishitá nos pais. For di Hulanda un kantidat di 15.964 turista a keda risibí, esaki ta 114% rekuperashon kompará ku e kantidat di turista risibí na sèptèmber 2019 na momentu ku 14.004 turista Hulandes a keda risibí. Otro merkadonan sekundario den region di Europa tambe a presta bon. Un kantidat di 1.076 turista di estadia a keda risibí for di Alemania i 766 for di Bèlgika.
For di e region di Nort Amérika un kantidat di 8.324 turista a bishitá Kòrsou representando 22.4% di e kantidat total di turista di estadia. Di e kantidat aki, un total di 8.010 a bini for di Estádos Unídos na sèptèmber 2022. E kantidat registrá for di Estádos Unídos na sèptèmber ta eksepshonal. Durante añanan anterior e kantidat di turista risibí na luna di sèptèmber nunka a surpasá e kantidat di 5.000 bishitante. Si kompará ku e mesun luna na 2019, na momentu ku un kantidat di 3.500 turista a keda risibí, ta trata aki di un rekuperashon di 229%. CTB ta mirando un demanda fuerte for di merkado di Estádos Unídos. Ta e di 4 luna konsekutivo ku sifranan rèkert ta keda registrá for di merkado di Estádos Unídos. Awor Kòrsou ta ofresé un variedat mas grandi di ‘US branded resort hotels’ lokual ta kosechando su frutanan espesialmente pa merkado di Estádos Unídos.
For di region di Sur Amérika un total di 6.030 turista di estadia a bishitá Kòrsou. Di e turistanan for di Sur Amérika, 2.263 tabata prosedente di Colombia. E rekuperashon for di Colombia ta kasi 100%. Na sèptèmber 2019 un kantidat di 2.274 turista a keda risibí. Un total di 1.025 tabata prosedente di Brazil.
For di region Karibe un total di 2,812 turista di estadia a keda risibí na sèptèmber. Mayoria di e turistanan aki ta prosedente di e paisnan di Karibe Hulandes.
Na luna di sèptèmber un total di 11 barku krusero a bishitá nos pais ku un total di 29.033 turista krusero.
