WILLEMSTAD – 10 di yanüari 2023 – Ofisina di Turismo di Kòrsou (CTB) ta raportá un kantidat rèkòrt di turista di estadia na 2022. Esaki ta e promé biaha ku Kòrsou a risibí kasi mei mion turista di estadia, faltando solamente 10.442 turista pa a yega e kantidat aki. Total, Kòrsou a risibí un kantidat di 489.558 turista di estadia na aña 2022. E promé kuartal di 2022 a kuminsá slo. Durante di e periodo ei ainda e variante Omicron tabata presente i restrikshonnan di biahe tabata vigente ainda pa algun pais. No opstante e komienso slo, e meta original di yega 375 mil turista durante 2022 tabata esun realístiko i faktibel.
For di luna di aprel 2022 CTB a mira un kresementu den kantidat di turista di estadia for di tur merkado di enfoke. Yüli 2022 ta e luna ku a registrá e mihó prestashon durante 2022 registrando un total di 48.246 turista di estadia. E delaster kuartal di 2022 a keda stabil registrando un mínimo di 44 mil turista pa luna. Ku e prestashon realisá na 2022 CTB ta anunsiá ku gran satisfakshon ku Kòrsou a rekuperá for di e sifranan influensiá pa e pandemia i asta a surpasá e rèkòrt anterior di aña 2015 kual tabata un kantidat di 467.538 turista di estadia.
Aña pasá nos a registrá un kantidat rèkòrt den turista di estadia for di nos merkadonan prinsipal, Hulanda i Estádos Unídos. For di Hulanda nos a risibí 237.654 turista di estadia. Total un kantidat di 278.468 turista di estadia a keda risibí for di Europa na 2022, e kantidat aki tambe ta pa promé biaha. Di e kantidat total di turista risibí na 2022 un kantidat di 57% ta prosedente di Europa.
Ta e promé biaha ku Kòrsou a risibí riba 90 mil turista di estadia for di Estádos Unídos. Aña pasá un total di 93.428 merikano a skohe pa bishitá nos pais. Total 105.593 turista a bishitá nos pais for di Nort Amérika representando 22% di e kantidat total di turista di estadia risibí durante 2022.
Colombia a terminá komo e di 3 merkado primario registrando 28.460 turista di estadia na 2022. E prestashon di e paisnanden Sur Amérika a surpasá nos espektativanan. For di Brazil i Sürnam nos a risibí respektivamente10.161 i 6.248 turista. E merkadonan sekundario den Sur Amérika a sera aña registrando un prestashon haltu ku nunka promé tabata e kaso, 3.409 for di Argentina, 3.986 for di Ecuador i for di Uruguay un kantidat di 2.111 turista a keda risibí. Un total di 13% di tur turista risibí na 2022 ta prosedente di Sur Amérika. For di region Karibe un total di 29.818 turista di estadia a keda risibí. Pais bisiña Aruba a sòru pa 10.935 turista di estadia. Un kantidat di 8.608 turista ta prosedente di e otro paisnan di Karibe Hulandes.
Desèmber 2022
CTB ta raportá un kantidat di 44.923 turista di estadia pa luna di desèmber. Ku e kantidat aki, luna di desèmber 2022 a alkansá 101% di e prestashon realisá na desèmber 2019 esta promé ku Pandemia. E último luna di aña su prestashon tabata loke a premirá manteniendo e trend di e temporada haltu di turismo. Kasi mitar (47%) di e turistanan ku a bishitá Kòrsou na luna di desèmber ta turistanan europeo. For di Hulanda ta trata di un total di 17.958 turista, for di Alemania 716 i for di Bèlgika 653. Informashon kompilá for di e karchinan di imigrashon ta indiká ku turistanan europeo a keda un averahe di 12.7 anochi na desèmber 2022.
Desèmber 2022 ta te na e momentunan aki e luna ku mihó prestashon for di Estádos Unídos. Un total di 10.411 turista di estadia a keda registrá surpasando e kantidat di 10.208 risibí na yüli 2022. Turistanan prosedente di Nort Amérika a keda un averahe di 7.6 anochi na desèmber 2022.
For di region di Sur Amérika un total di 5.957 turista di estadia a bishitá Kòrsou. Di e turistanan for di Sur Amérika, 52% tabata prosedente di Colombia i 17% for di Brazil. E turistanan for di Sur Amérika a keda un averahe di 8.2 anochi.
For di region Karibe un total di 2.891 turista di estadia a keda risibí na desèmber. Mayoria di e turistanan aki ta prosedente di e paisnan di Karibe Hulandes.
Na luna di desèmber un total di 43 barku krusero a bishitá nos pais ku un total di 95.680 turista krusero. Riba e gráfiko por mira un komparashon di e kantidat di turista di estadia risibí na 2022 kompará ku aña 2021 i ku aña 2019 esta promé ku pandemia (nosbenchmark year). Ku e tremendo prestashon realisá na 2022, CTB ta finalisá e komparashon ku tabata keda hasí ku e sifranan promé ku pandemia. E enfoke pa 2023 ta pa sigui traha den kolaborashon estrecho ku tur stakeholder pa surpasá e prestashon di 2022. E ophetivo prinsipal ta pa risibí na final di e aña aki por lo ménos mei mion turista di estadia.
