Karnaval di Kòrsou bon bishitá pa turistanan
WILLEMSTAD – 10 di mart 2023 – Ofisina di Turismo di Kòrsou (CTB) ta raportá ku Kòrsou a risibí un total di 42.562 turista di estadia durante luna di febrüari. Esaki ta 20% mas ku e 35.453 turista di estadia ku a bishitá Kòrsou na febrüari 2022. Luna di febrüari a mustra un bon prestashon for di Nort Amérika, Sur Amérika i region di Karibe. Region di Nort Amérika ta mustra un kresementu di 146%, Sur Amérika 82% i Karibe 89%. No opstante e bahada di 23% den kantidat di turista di estadia for di region di Europa, e kantidat total di turista di estadia registrá na luna di febrüari 2023 tabata tòg positivo. E region di Europa ainda ta nos merkado di mas grandi. Na febrüari nos a risibí for di Europa 18.865 turista di estadia siguí pa 15.003 for di Nort Amérika, 5.422 prosedente di Sur Amérika, for di Karibe 2.290 i 982 for di sobrá paisnan di mundu.
Total Kòrsou a risibí un averahe di 1.520 turista di estadia pa dia na luna di febrüari. CTB ta mira un subida riba e dianan rondó di e paradanan prinsipal di Karnaval. E kantidat di turista di estadia risibí riba djabièrnè tabata 1.846, djasabra 1.660, djadumingu 1.749 i e total risibí riba djaluna tabata 1.702. Total e bishitantenan a keda un averahe di 9 anochi riba nos pais. Un total di 36% di e turistanan ku a biaha pa Kòrsou ta personanan entre e edat di 45 – 64 i 34% ta entre 25 – 44. Un total di 60% di tur bishitante a skohe pa keda den un resort hotel (esta hotèl grandi, chikí i bùngalo).
Kòrsou a risibí 16.025 turista di estadia for di Hulanda na luna di febrüari kual ta representá 38% di e kantidat total di bishitante risibí. Mayoria di e turistanan hulandes ku a biaha pa Kòrsou na luna di febrüari ta biba den un di e 3 provinsianan aki: Sur di Hulanda (23%), Nort di Hulanda (21%) i Nort di Brabant (11%). For di Alemania nos a risibí 815 turista di estadia, miéntras ku for di Bèlgika un kantidat di 534 turista di estadia a keda risibí. Total Kòrsou a risibí 18.865 turista europeo. Di e turistanan europeo, 54% a keda den un resort hotel.
For di Estádos Unídos un kantidat di 10.700 turista di estadia a bishitá Kòrsou kual ta representá 25% di e kantidat total di bishitante risibí. E turista merikano a keda un averahe di 6.7 anochi na Kòrsou. Miéntras un mayoria di 75% a keda den un resort hotel na luna di febrüari. For di Canada nos a risibí 4.303 turista di estadia; di e turistanan kanades aki un total di 69% a keda den resort hotels. Un mayoria di 55% di e turistanan kanades ku a bishitá nos pais na febrüari ta prosedente di Ontario i 26% ta biba na Quebec.
For di region di Sur Amérika un total di 5.422 turista di estadia a bishitá Kòrsou. Di e turistanan for di Sur Amérika, 1.754 esta 32% tabata prosedente di Colombia. Miéntras, 1.189 (22%) tabata prosedente di Brazil. Un mayoria di 55% di e turistanan di estadia prosedente di Sur Amérika a keda den un resort hotel na luna di febrüari. For di region Karibe un total di 2.290 turista di estadia a keda risibí na febrüari. Mayoria di e turistanan aki ta prosedente di e paisnan di Karibe Hulandes.
Na luna di febrüari un total di 42 barku krusero a bishitá nos pais ku un total di 103.563 turista krusero. Na febrüari 2022, Curaçao Ports Authority (CPA) a raportá 41 barku krusero ku un total di 43.991 turista krusero.
