WILLEMSTAD – 18 di aprel 2023 – Ofisina di Turismo di Kòrsou (CTB) ta raportá ku Kòrsou a risibí un total di 45.914 turista di estadia durante luna di mart. Esaki ta 13% mas ku e 40.541 turista di estadia ku a bishitá Kòrsou na mart 2022. Miéntras industria di turismo a eksperensiá un bahada den kantidat di turista for di Europa, e region di Nort Amérika, Sur Amérika i di Karibe a registrá un kresementu supstansial durante e mesun periodo. Region di Europa ta sigui mantené su posishon komo e merkado ku ta sòru pa mayoria di e turistanan ku ta bishitá nos pais. Na luna di mart nos a risibí for di Europa 19.953 turista di estadia kual ta 43% di e total di turista risibí, siguí pa Nort Amérika ku 15.707 turista (34%), Sur Amérika ku 6.263 turista (14%), Karibe ku 2.914 turista (6%) i un total di 1.077 turista di estadia esta 2% a keda risibí for di sobrá paisnan di mundu.
Informashon kompilá for di e karchinan di imigrashon ta mustra ku total turistanan a keda un averahe di 8.5 anochi riba nos pais. Un total di 37% di e turistanan ku a biaha pa Kòrsou ta personanan entre e edat di 45 – 64 miéntras 35% ta entre 25 – 44. Di tur e turistanan, un total di 60% a skohe pa keda den un resort hotel (esta hotèl grandi, chikí i bùngalo). Un total di 87% di e turistanan di estadia na luna di mart su propósito di biahe tabata vakashon sigui pa negoshi kual tabata 5% i kasamentu 2%.
Kòrsou a risibí 16.287 turista di estadia for di Hulanda na luna di mart. Turistanan hulandes ku a biaha pa Kòrsou na luna di mart a keda un averahe di 11 anochi i 53% a keda den un resort hotel. For di Alemania nos a risibí 1.450 turista di estadia, miéntras for di Bèlgika un kantidat di 668 turista di estadia a keda risibí.
For di Estádos Unídos un kantidat di 11.858 turista di estadia a bishitá Kòrsou na mart kual ta representá 60% kresementu kompará ku e mesun periodo na aña pasá. Turistanan merikano a keda un averahe di 6.4 anochi na Kòrsou. Miéntras un mayoria di 74% a keda den un resort hotel na luna di mart. For di Canada nos a risibí 3.849 turista di estadia; di e turistanan kanades aki un total di 73% a keda den resort hotels. Turistanan kanades ku a biaha pa Kòrsou na luna di mart a keda un averahe di 8 anochi riba nos pais.
For di region di Sur Amérika un total di 6.263 turista di estadia a bishitá Kòrsou. Di e turistanan for di Sur Amérika, 2.748 esta 44% tabata prosedente di Colombia. Miéntras, 1.329 (21%) tabata prosedente di Brazil. Un mayoria di 65% di e turistanan di estadia prosedente di Sur Amérika a keda den un resort hotel na luna di mart. For di region Karibe un total di 2.914 turista di estadia a keda risibí na mart. Mayoria di e turistanan aki ta prosedente di e paisnan di Karibe Hulandes. Na luna di mart un total di 42 barku krusero a bishitá nos pais ku un total di 107.307 turista krusero. Na mart 2022, Curaçao Ports Authority (CPA) a raportá 39 barku krusero ku un total di 60.237 turista krusero.
