WILLEMSTAD- 26 di aprel 2023 – Despues ku e frontera entre Kòrsou i Venezuela tabata será pa 4 aña, 26 di aprel 2023 e promé aerolínea for di Venezuela a inisiá ku buelonan pa Kòrsou. Albatros Airlines lo ehekutá 2 ruta for di Venezuela. Ta trata di e ruta Valencia – Kòrsou i Las Piedras – Kòrsou. E aerolínea ya tabata bula e konekshon Venezuela – Korsou den pasado. Na yegada di tur dos buelo na Aeropuerto Internashonal Hato e avionnan a keda risibí ku e tradishonal saludo di awa.
E buelonan di Albatros Airlines lo ta dos biaha pa siman riba djárason i djabièrnè. E buelonan ta keda efektuá ku un Embraer 120 ku un kapasidat di 30 stul. Ofisina di Turismo di Korsou (CTB) ta kontentu ku awor por kuminsá risibí turistanan atrobe for di e merkado di Venezuela. Venezuela semper tabata un merkado importante pa Kòrsou. CTB ya ta ehekutando diferente akshon di merkadeo na Venezuela. Ademas luna pasá den antisipashon di re-apertura di frontera ku Venezuela, CTB a ofresé un seshon di planifikashon pa sales managers di e sektor di turismo kaminda a duna informashon referente e potensial bishitante for di Venezuela, partnernan komersial na Venezuela, konektividat entre Venezuela i Kòrsou i e proseso di aplikashon di Visa.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Albatros Airlines ku inisio di e konekshon entre Venezuela i Kòrsou i ta deseá nan tur kos bon.
