For di Caracas
WILLEMSTAD- 5 di mei 2023 – Laser Airlines a bira e di dos aerolínea ku ta inisiá ku buelo pa Kòrsou despues di re-apertura di frontera entre Kòrsou i Venezuela. E buelo di Laser Airlines ta sali for di e siudat Caracas. E aerolínea ya tabata bula e konekshon Venezuela – Kòrsou den pasado. Na yegada di e promé buelo na Aeropuerto Internashonal Hato e avion a keda risibí ku e tradishonal saludo di awa.
E buelonan di Laser Airlines lo ta dos biaha pa siman riba djamars i djabièrnè. E buelonan ta keda efektuá ku un MD82 ku un kapasidat di 150 stul. Ofisina di Turismo di Kòrsou (CTB) ta kontentu ku otro aerolínea mas a inisiá ku buelo for di Venezuela e biaha aki for di e kapital, Caracas. E echo ku e buelo ta inisiá for di Caracas ta duna e venezolano i nos komunidat lokal mas opshon di biahe. CTB ya ta ehekutando diferente akshon di merkadeo na Venezuela pa mustra e produkto turístiko aktualisá ku Kòrsou tin pa ofresé, variedat di akomodashon, restorantnan i diferente atrakshon turístiko.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Laser Airlines ku inisio di e konekshon entre Venezuela i Kòrsou i ta deseá nan tur kos bon.
