no opstante komienso temporada slou di turismo
WILLEMSTAD- 16 di yüni 2023 – Ofisina di Turismo di Kòrsou (CTB) ta raportá ku Kòrsou a risibí un total di 43.532 turista di estadia durante luna di mei. Esaki ta representá un kresementu di 22% kompará ku mei 2022 na momentu ku 35.813 turista di estadia a bishitá Kòrsou. Esaki ta promé biaha den historia ku Kòrsou a risibí 43 mil turista di estadia na luna di mei. E rèkòrt anterior pa luna di mei tabata na 2019 na momentu ku un total di 36.386 turista di estadia a keda registrá.
Manera por mira den e imágen abou, te ku aworakí Kòrsou a yama bon bini na un mínimo di 42 mil turista di estadia den un solo luna. Tabata di spera ku e kantidat di bishitante risibí na mei kompará ku luna di aprel lo tabata ménos dor di fluktuashon di “seizoen” (seasonality), no opstante esaki e kantidat di turista di estadia risibí na mei tabata riba 43 mil ilustrando e demanda grandi pa Kòrsou. E imágen abou ta mustra tambe e prestashon di e lunanan di aña 2023 kompará ku aña 2022, ilustrando e prestashon positivo di e promé 5 lunanan di aña.
Kantidat di turista di estadia pa kada region na mei 2023
E kantidat di turista di estadia risibí for di Nort Amérika a dòbel na luna di mei registrando 138% kresementu, markando un tendensia prometedor pa kresementu kontinuo for di e region aki. Total 12.178 turista a bishitá nos for di Nort Amérika. For di Sur Amérika tin un kresementu supstansial, CTB ta raportá un kresementu di 51% den kantidat di turista di estadia. Region di Karibe tambe ta mustra kresementu, registrando 30% mas turista kompará ku aña pasá. Europa ta e úniko region ku a kai den kantidat di turista (-14%), no opstante esaki Europa ta keda esun promé den kantidat total di turista ku a bishitá Kòrsou. Region di Europa ta representá 43% di e total di bishitante ku a biaha pa nos pais. E imágen abou ta mustra e prestashon di kada region kompará ku aña pasá inkluyendo e kantidat ku kada region ta representá den e total di turista di estadia ku a bishitá nos pais.
E 5 merkadonan prinsipal
Huntu e 5 merkadonan prinsipal na luna di mei 2023 a representá un total di 32.995 (76%) turista di estadia. CTB ta mira un bahada den kantidat di turista di estadia for di Hulanda, komo konsekuensia di e bahada den kantidat di stul for di e merkado hulandes, sinembargo dor di e diversifikashon kaminda otro merkadonan prinsipal ta presta di forma espektakular esaki ta sòru pa e prestashon total ta positivo. No opstante e echo ku a registrá ménos turista hulandes na luna di mei 2023, CTB ta raportá ku e kantidat di turista registrá for di Hulanda ta igual ku na mei 2019 na momentu ku un kantidat di 15.713 turista hulandes a keda risibí. For di Estádos Unídos nos a registrá 138% mas turista. Un di e motibunan prinsipal pa e oumento aki ta e bon kolaborashon entre sektor públiko i privá den promoshon di Kòrsou na Estádos Unídos. Ademas for di 6 di aprel último e kantidat di buelo di JetBlue for di JFK tambe a oumentá. E imágen abou ta ilustrá e prestashon di e 5 merkadonan prinsipal inkluyendo e tòp 3 estadonan for di kua nos turistanan ta prosedente.
Akomodashon, kantidat di anochi averahe i demografia
Informashon kompilá for di e karchinan di imigrashon ta mustra ku total turistanan a keda un averahe di 8 anochi riba nos pais. Di tur e turistanan, un total di 61% a skohe pa keda den un resort hotel (esta hotèl grandi, chikí i bùngalo). Un total di 37% di e turistanan ku a biaha pa Kòrsou ta personanan entre e edat di 25 – 44 miéntras 30% ta entre e edat di 45 – 64. E imágennan abou ta ilustrá e akomodashon i demografia di e turistanan ku a biaha pa Kòrsou den luna di mei 2023.
Prestashon turismo krusero
Na luna di mei un total di 15 barku krusero a bishitá nos pais ku un total di 40.697 turista krusero. Aña pasá mei, Curaçao Ports Authority (CPA) a raportá 8 barku krusero ku un total di 28.362 turista krusero.
