WILLEMSTAD- 3 di yüli 2023 – Ofisina di Turismo di Kòrsou (CTB) ta anunsiá ku Air Canada a kambia nan ruta di temporada ku ta sali for di Toronto, pa un servisio ku ta keda ofresé durante henter aña. Di otro banda, American Airlines lo lansa un servisio diario nòn-stòp for di Charlotte kuminsando na Desèmber 2023. E oumento den konekshon aéreo tin komo meta satisfasé e interes kresiente ku tin pa eksplorá e paisahenan impreshonante, kultura vibrante, i eksperensianan inigualabel ku Kòrsou tin pa ofresé.
For di yüni 2023, Air Canada a inisiá ku buelonan regular for di Toronto durante henter aña, permitiendo asina pa biaheronan disfrutá di e enkanto i bunitesa natural di nos isla, sin importá e temporada di aña. E aerolínea awor ta ofresé servisio nòn-stòp riba djaluna, djaweps, i djasabra saliendo for di Toronto 9:30 AM i yegando Kòrsou 2:40 PM, ku un buelo di regreso for di Kòrsou ku ta sali 3:40 PM i ta yega Toronto 9:10 PM.
Ademas, pa kumpli ku e demanda kresiente, entrante 3 di desèmber 2023 te ku 3 di aprel 2024, American Airlines lo lansa su servisio diario for di Charlotte, North Carolina. Esaki ta nifiká ku ta bai tin buelo for di Charlotte 7 biaha pa siman, kompará ku e konekshon di un biaha pa siman ku tin aktualmente. Buelonan lo sali for di Charlotte 9:05 di mainta i yega Kòrsou 2:14 mèrdia, ku un buelo di regreso saliendo for di Kòrsou 3:52 p.m. i yegando Charlotte 7:10 p.m. E desaroyo akí lo brinda biaheronan for di Merka akseso kumbiniente na Kòrsou, i asina hasi biahamentu pa e prenda den Karibe akí mas fásil ku nunka. Ademas, e buelonan adishonal akí ta brindá tambe mas opshon di biahe pa nos hendenan lokal.
“Kòrsou ta trahando hopi tempu kaba na desaroyo di produkto i infrastruktura pa atraé e turista Norte Amerikano,” asina Ruisandro Cijntje, Minister di Desaroyo Ekonómiko, a bisa. “E introdukshon di konekshon aéreo durante henter aña for di Toronto ku Air Canada, i tambe e servisio diario for di Charlotte ku American Airlines, ta suprayá mas ainda e kresementu kontinuo di e isla i nos kompromiso pa brinda bishitantenan un eksperensia di biahe eksepshonal. Nos ta ansioso pa yama bon biní na mas bishitante ainda ku ta bin eksplorá e paisahenan impreshonante, historia riku, i hospitalidat kaluroso di nos isla.”
E oumento di buelo akí ta suprayá e esfuersonan hasí i e bon kolaborashon di Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH), aerolíneanan i partnernan den e sektor di biahe, pa asina sostené e kresementu turístiko di e isla i sigurá un eksperensia di biahe dushi i sin problema pa nos bishitantenan.
