WILLEMSTAD – 10 di yüli 2023 – Resientemente un total di 77 kursista a risibí nan sertifikado komo parti di e programa di training Her & Bijscholingstraject Hospitality Sector. Ta trata di e siguiente kursonan: asistente kòki, asistente bartènder, asistente weiter i housekeeping. E personanan aki a sigui un kurso kòrtiku (crash course) den kua nan a haña sufisiente konosementu básiko teorétiko i tambe práktika pa por drenta e sektor di hospitalidat. Ta trata aki di un total di 38 asistente kòki, 16 asistente bartènder, 13 asistente weiter i 10 persona ku a risibí sertifikado di Housekeeping. Ademas, un grupo di 22 persona di diferente organisashon den e mundu di hospitalidat a risibí nan sertifikado di Leermeester training. E personanan aki ta esnan responsabel pa guia e kursistanan na nan leerbedrijf. Durante un seremonia ameno, Minister di Desaroyo Ekonómiko, sr. Ruisandro Cijntje a hasi entrega di sertifikado na e kursistanan.
E kursonan di asistente kòki, asistente bartènder, asistente weiter i housekeeping tabatin un durashon di 12 siman. Despues di a kompletá e kurso, e partisipante ta sigui traha na un leerbedrijf den sektor di hospitalidat pa un periodo di 5 luna i ta risibí un salario. Na e momentunan aki ya tin 54 partisipante ku ta trahando na un leerbedrijf. Despues di kompletá e 5 lunanan, e kompania tin e posibilidat pa ofresé e partisipante un kontrato di trabou basá riba su prestashon. Tambe e kursistanan a kompletá e Personal Empowerment training kual tabata dirigí riba desaroyo di nan abilidatnan interpersonal.
E programa di training, Her & Bijscholingstraject Hospitality Sector ta resortá bou di Ministerio di Desaroyo Ekonómiko (MEO) miéntras Ofisina di Turismo di Kòrsou (CTB) ta enkargá ku ehekushon di e programa. E programa ta keda ehekutá den estrecho kolaborashon ku Ministerio di Labor (SOAW), Ministerio di Enseñansa (OWCS) i partnernan den sektor privá. Den e periodo tras di lomba a ehekutá training di guia turístiko, resepshonista, masashi, asistente kòki, asistente weiter i asistente bartènder. Aktualmente tin 90 persona siguiendo training di housekeeping, asistente kòki, asistente weiter i asistente bartènder i ta pendiente pa start pronto ku un grupo nobo pa e training di guia turístiko. Un total di mas di 30 kompania ta kontribuyendo na e proyekto komo leerbedrijf brindando di e manera aki e partisipantenan un oportunidat pa por haña un trabou den sektor di hospitalidat. Pa registrá pa e programa di training bishitá www.curacaotouristboard.com/education/
CTB, MEO, SOAW i OWCS ta felisitá e kursistanan i ta deseá nan tur klase di éksito na nan leerbedrijf.
