WILLEMSTAD- 17 di yüli 2023 – Ofisina di Turismo di Kòrsou (CTB) ta raportá ku Kòrsou a risibí un total di 272.870 turista di estadia entre luna di yanüari i yüni 2023. Esaki ta representá un kresementu di 20% kompará ku e mesun periodo na 2022 na momentu ku 227.553 turista di estadia a bishitá Kòrsou. Anteriormente, CTB a indiká ku e meta pa 2023 ta pa yega 525.000 turista di estadia. E promé seis lunanan ta mustra klaramente ku e kantidat di turista di estadia ku nos ta risibiendo ta bayendo den bon direkshon pa logra e meta stipulá pa e aña aki. Te ku e momentunan aki, kada luna ta surpasando e meta mensual stipulá pa nos bula mei mion turista di estadia pa promé biaha den historia. E imágen abou ta mustra e prestashon mensual di 2023 kompará ku e meta mensual i e kantidat di bishitantenan risibí aña pasá.
Kantidat di turista di estadia pa kada region na yüni 2023
Un total di 44.370 turista di estadia a keda risibí na luna di yüni 2023 kual ta un kresementu di 18% kompará ku yüni 2022. E kaida antisipá di region di Europa a keda registrá na luna di yüni ku 8% ménos turista. CTB a registrá un total di 13.804 turista hulandes na yüni, aña pasá Kòrsou a risibí 14.796 turista hulandes kual ta un bahada di 7%. E kantidat di turista for di region di Nort Amérika a registrá un kresementu di 45%. Total 14.281 turista Norte amerikano a keda risibí di kua 13.071 ta residente di Merka. Ta e promé biaha den historia ku CTB ta registrá 13 mil turista di estadia den un solo luna for di Merka.
Ademas tin un kresementu supstansial den e kantidat di turista risibí for di Sur Amérika, registrando 41% kresementu den kantidat di bishitante. Region di Karibe tambe ta mustra kresementu, registrando 45% mas bishitante kompará ku aña pasá. E imágen abou ta mustra e prestashon di kada region kompará ku aña pasá inkluyendo e kantidat ku kada region ta representá den e kantidat total di turista di estadia ku a bishitá nos pais.
E paisnan den tòp 5
Huntu e paisnan den tòp 5 na luna di yüni 2023 a representá 76% den e kantidat total di turista di estadia risibí. CTB ta mira un bahada den kantidat di turista di estadia for di Hulanda, komo konsekuensia di e bahada den kantidat di stul for di e merkado hulandes, sinembargo dor di e diversifikashon kaminda otro merkadonan prinsipal ta presta di forma espektakular esaki ta sòru pa e prestashon total ta positivo. Aunke a registrá ménos turista hulandes na luna di yüni 2023, CTB ta raportá ku e kantidat di turista registrá for di Hulanda ta similar kompará ku yüni 2019, na momentu ku 13.082 turista hulandes a keda risibí. For di Merka nos a registrá 36% mas turista kompará ku yüni 2022. Un di e motibunan prinsipal pa e oumento aki ta e bon kolaborashon entre sektor públiko i privá den promoshon di Kòrsou na Merka. Ademas for di 6 di aprel último e kantidat di buelo di JetBlue for di JFK tambe a oumentá. E imágen abou ta ilustrá e prestashon di e tòp 5 paisnan inkluyendo e tòp 3 estadonan for di kua nos turistanan ta prosedente.
Akomodashon, kantidat di anochi averahe i demografia
Informashon kompilá for di e karchinan di imigrashon ta mustra ku total turistanan a keda un averahe di 7.9 anochi riba nos pais. Di tur e turistanan, un total di 61% a keda den un resort hotel. Hopi di e turistanan ku a biaha pa Kòrsou na yüni ta den e edat di 25 – 44 (40%) miéntras 32% ta entre e edat di 45 – 64. E imágennan abou ta ilustrá e akomodashon i demografia di e turistanan ku a biaha pa Kòrsou na yüni 2023.
Prestashon turismo krusero
Tabatin 8 barku krusero i 18.436 turista krusero na yüni. Aña pasá yüni, Curaçao Ports Authority (CPA) a raportá 9 barku krusero i 29.808 turista krusero.
