…..i entrante medio desèmber 2023 e frekuensia di buelo lo oumentá na dos biaha pa siman
WILLEMSTAD- 31 di yüli 2023 – Ofisina di Turismo di Kòrsou ta anunsiá ku durante luna di òktober i novèmber próksimo e aerolínea Azul lo brinda un opshon mas di buelo direkto di Brazil pa Kòrsou. E desishon pa introdusí un buelo direkto èkstra pa Kòrsou ta bini komo resultado di e demanda haltu generá dor di e lansamentu resien di e ruta ku ta konektá Belo Horizonte, Brazil ku Kòrsou kual ta keda operá riba tur djasabra. Ademas manera informá anteriormente, medio desèmber 2023 e frekuensia di nan buelo regular pa Kòrsou lo oumentá na dos biaha pa siman.
E buelonan èkstra lo ta riba tur djárason entrante 11 di òktober te ku 23 di novèmber 2023. E buelo lo sali Belo Horizonte 1or di mèrdia i ta yega Kòrsou 6or di atardi. E buelo di regreso lo sali Kòrsou riba tur djaweps 9or di mainta i ta baha 4or di atardi na Belo Horizonte. E ruta nobo ta benefisiá tambe biaheronan for di São Paulo, Rio de Janeiro, Goiânia, Brasília i Vitória ku por konektá via Belo Horizonte. Pues entrante luna di òktober próksimo, e aerolínea Azul lo efektuá dos buelo pa siman pa Kòrsou riba djárason i tambe djasabra kual ta brinda mas opshon di biahe pa e brasilero ku ke bishitá nos isla pa vakashon òf negoshi pero tambe nos pueblo lokal ku ke bishitá Brazil.
Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta deseá Azul Airlines tur kos bon ku introdukshon di e buelonan èkstra pa Kòrsou.
