manteniendo e ‘trend’ di zomer…
WILLEMSTAD- 12 di sèptèmber 2023 – Kòrsou a eksperensiá un kresementu impreshonante na luna di ougùstùs 2023, registrando un oumento di 16% kompará ku e mesun periodo na aña pasá. Ku un total di 49.258 turista di estadia luna di ougùstùs a bira e di dos luna ku mihó prestashon den e aña aki, siguiendo serka tras di luna di yüli na momentu ku 50.937 turista a bishitá nos pais.
E estadístikanan te na e momentunan aki ta ilustrá un prestashon impreshonante pa industria di turismo di Kòrsou, ku un total akumulativo di 373.068 turista di estadia na 2023. E kantidat aki ta representá un kresementu supstansial di 17% kompará ku 318.432 turista ku a bishitá Kòrsou durante e mesun periodo na 2022. E imágen abou ta mustra e prestashon mensual di 2023 kompará ku e meta mensual i e kantidat di turista risibí na aña pasá.
Kantidat di turista di estadia na ougùstùs 2023
Loke berdaderamente ta distinguí e luna aki ta e éksito eksepshonal di dos merkado for di kua nos ta risibí nos turistanan kual ta Estádos Unídos i Brazil, ámbos a registrá rèkòrtnan históriko. E paisnan aki ya a superá e kantidat di turista di estadia registrá den 8 luna, un éksito ku anteriormente a ser lográ den henter un aña.
For di Estádos Unídos, Kòrsou a risibí un total remarkabel di 94.275 turista di estadia den e promé 8 lunanan di 2023. E logro aki ta surpasá e aña di mihó prestashon den kantidat di turista di estadia for di Estádos Unídos kaminda a registrá 93.428 bishitante durante henter 2022. E otro prestashon eksepshonal ta di e merkado di Brazil. Den e promé 8 lunanan di 2023, Kòrsou a registrá un total di 14.398 turista brasilero surpasando e rèkòrt anterior di 13.446 bishitante for di Brazil na aña 2019. Faltando 4 luna mas di e aña aki, Ofisina di Turismo di Kòrsou (CTB) ta antisipá ku ámbos merkado lo sigui mustra kantidatnan espektakular di turista di estadia te ku fin di aña. E prestashon remarkabel aki ta resultado di konsistensia den e strategia di merkadeo i e bon kolaborashon ku partnernan den industria. Adishonalmente, Kòrsou awor ta ofresé un variedat amplio di resort loke ta generá un gran demanda pa bishitá Kòrsou. Nos partnernan aéreo a respondé na e gran demanda aki, ku a resultá den kresementu den kapasidat di asiento òf introdukshon di servisio nobo pa nos destinashon. Hulanda a eksperensiá un leve bahada, registrando 9% ménos turista di estadia, ku un total di 17,146 turista hulandes na ougùstùs 2023. E prestashon di region di Europa a baha ku 12%. Sinembargo, e kantidat di turista di estadia for di region di Nort Amérika a krese ku 44%. Total un kantidat di 13.524 turista a keda registrá prosedente di Nort Amérika, di kua 11.834 ta residente di Estádos Unídos. Tambe tin un kresementu supstansial den kantidat di turista for di Sur Amérika, CTB ta raportá un kresementu di 60% den kantidat di turista di estadia. Den sifranan apsoluto, nos a yama bon biní na 10.477 turista for di Sur Amérika na luna di ougùstùs. Region di Karibe tambe ta mustra kresementu, registrando 44% mas turista kompará ku aña pasá, un total di 3.830 turista for di paisnan bisiña. E imágen abou ta mustra e prestashon di kada region kompará ku aña pasá, inkluyendo e kantidat ku kada region ta representá den e total di turista di estadia ku a bishitá nos pais.
E paisnan den tòp
Huntu e paisnan den tòp 5 na luna di ougùstùs 2023 a representá un total di 73% den kantidat di turista di estadia. Aunke a registrá ménos turista hulandes, Hulanda ta keda e merkado ku a registrá mas tantu turista ku un total 17.146 turista na luna di ougùstùs. Apesar di registrá ménos turista hulandes kompará ku ougùstùs 2022, CTB ta raportá ku e kantidat di bishitante for di Hulanda ta mas haltu kompará ku ougùstùs 2019 na momentu ku 15.860 turista hulandes a keda registrá. Estádos Unídos, Canada, Brazil i Colombia a registrá kresementu fuerte na ougùstùs. E imágen abou ta ilustrá e prestashon di e 5 merkadonan tòp inkluyendo e tòp 3 estadonan for di kua nos turistanan ta prosedente.
Tipo di akomodashon, promedio di anochi i demografia
Informashon kompilá for di e karchinan di imigrashon ta mustra ku total turistanan a pasa un promedio di 8.2 anochi na Kòrsou durante luna di ougùstùs. Turistanan hulandes a pasa un promedio di 11.1 anochi na luna di ougùstùs. E bishitantenan for di Estádos Unídos i Brazil a pasa un promedio di 6 i 7.1 anochi respektivamente na ougùstùs. Di tur e turistanan, 62% a keda den un resort hotel. Hopi di e turistanan ku a biaha pa Kòrsou na ougùstùs ta entre 25 – 44 aña (38%) miéntras 30% ta entre 45 – 64 aña. E imágennan abou ta ilustrá e akomodashon i demografia di e turistanan ku a biaha pa Kòrsou na ougùstùs 2023.
E diversifikashon den e diferente merkadonan for di kua Kòrsou ta risibí su turistanan ta konforme CTB su strategia di merkadeo. Konsekuentemente esaki ta trese oportunidatnan di negoshi pa sektor privá riba nos pais. E turista for di Estádos Unídos i Brazil ta keda ménos dia, sinembargo nan ta e grupo di bishitante ku ta gasta mas riba nos pais kompará ku e otro turistanan. E bishitantenan di Estádos Unídos i Brazil ta gasta respektivamente $270 i $351 pa persona pa dia. Esaki ta brinda oportunidat ideal pa sektor privá lokal. Kòrsou ta risibiendo mas turista kompará ku añanan anterior. E diferensia ta ku nos ta risibiendo ménos turista hulandes, sinembargo esaki no ta nifiká ku nos mester usa solamente e faktor aki pa midi progreso di industria di turismo i saka konklushonnan desfaborabel. Kòrsou ta ofresé awendia un produkto mas amplio ku ta varia for di lugá pa keda, gastronomia i atrakshonnan. Esaki ta duna nos bishitantenan mas opshon pa skohe for di dje, kual na final ta mihó pa e eksperensia total durante nan estadia na Kòrsou.
