WILLEMSTAD- 15 di sèptèmber 2023 – Resientemente Ofisina di Turismo di Kòrsou (CTB) huntu ku Diamond PR a organisá un ‘mega’ trep úniko pa 30 influencers riba TikTok prosedente di Estádos Unídos i Canada bin sera konosí ku Kòrsou. Meta di e trep tabata pa oumentá e konosementu di nos destinashon bou di nos merkadonan di enfoke i asina alkansá un grupo grandi di futuro bishitante. E grupo di TikTokers a keda di 12 pa 15 di sèptèmber i a eksplorá, deskubrí i eksperensiá e produkto turístiko úniko ku Kòrsou ta ofresé. Nan ta kompartí nan eksperensianan riba nos isla via videonan atraktivo ku ta alkansá un oudiensia kombiná di riba 40 mion siguidó. Ta trata di TikTokers ku ta krea kontenido rondó di tópikonan manera, biahe, gastronomia, buseo, bailamentu, moda, LGBTQ, entretenamentu, deporte i wellness.
E programa a inisiá ku un Mini Karnaval kaminda e grupo di TikTokers a keda kompañá pa un brassband i algun persona den nan trahe di Karnaval saliendo for di Wilhelmina Park pasando riba Emmabrug i terminá den Kurá Hulanda Village. Su siguiente dia, e grupo a partisipá na un Willemstad tour riba scooter pa atmirá entre otro e muralnan kolorido i pa nan almuerso nan a bishitá Plasa Bieu. Tambe nan a bishitá Parke Nashonal Shete Boka, Kenepa Grandi, kore riba jetski i landa na Cas Abou. Mas aleu, nan a partisipá na entre otro un workshop kulinario, un tour riba buggy pa eksplorá parti Ost di Kòrsou i un workshop na Hòfi Mango pa siña traha nan propio te di yerba. E bishita na Kòrsou a forma parti di un proyekto total kordiná pa e agensia Diamond PR bou di e nòmber TikTok Island Hop, kaminda e TikTokers a bishitá tantu Boneiru komo Kòrsou.
Ta bon pa menshoná, ku TikTok ta e plataforma di medionan sosial ku a konosé e kresementu mas aselerá, e ta disponibel den 160 pais, ku riba 1.1 bion usuario aktivo i e plataforma a ser deskargá mas di 220 mion biaha na Merka. Gen Z (20% di e poblashon na Merka) ta usa TikTok komo ‘search engine’ i no Google. Tambe e edat di e usuarionan ta subiendo, riba 50% ta riba 30 aña.
CTB ta kontentu ku e kolaborashon ku Tourism Corporation Bonaire (TCB), Diamond PR i partnernan di turismo na Kòrsou pa asina por a mustra e diversidat di nos produkto turístiko na un grupo importante di TikTokers.
