Entrante febrüari 2024
WILLEMSTAD – 18 di sèptèmber 2023 – Ofisina di Turismo di Kòrsou (CTB) ta anunsiá ku entrante febrüari 2024, JetBlue lo agregá dos buelo adishonal, oumentando e frekuensia di e buelo nòn-stòp pa Kòrsou di sinku biaha pa siman na buelo diario durante e sobrá di e skema di wenter. E oumento aki, ta sigui e ekspanshon anterior ku JetBlue a hasi na luna di aprel último, na momentu ku e aerolínea a oumentá e buelo nòn-stòp pa Kòrsou di tres biaha pa siman na sinku biaha pa siman. Introdukshon di e servisio diario entrante febrüari 2024 ta bini komo resultado di e demanda kresiente for di e merkado merikano.
Ku e oumento den kantidat di buelo entrante febrüari 2024, rutanan ida i buèlta lo ta disponibel tur dia i lo sali for di New York (JFK) 8’or di mainta i yega Kòrsou pa 1:25 mèrdia, ku un buelo di regreso for di Kòrsou pa JFK saliendo 2:25 p.m. i yegando 6:29 p.m. Di akuerdo ku Minister di Desaroyo Ekonómiko, Ruisandro Cijntje, “Esaki ta un logro hopi importante pa sigui engrandesé nos turismo den 2024 i konsekuentemente duna un impulso na nos ekonomia”.
Turismo di Kòrsou ta sigui riba bon kaminda. E esfuersonan pa Kòrsou ta mas aksesibel pa turistanan for di Estádos Unídos, ta un kolaborashon estrecho entre JetBlue i partnernan lokal manera, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA). CTB ta ansioso pa risibí mas bishitante for di Estádos Unídos i kompartí ku nan e bunitesa di nos pais.
