WILLEMSTAD- 26 di sèptèmber 2023 – Tur aña riba dia 27 di sèptèmber ta konmemorá Dia Mundial di Turismo. Konmemorashon di Dia Mundial di Turismo tin komo ophetivo pa promové e importansia di turismo i su balor sosial, kultural i ekonómiko. Tema sentral e aña aki ta Turismo i Invershonnan bèrdè (sostenibel) enfatisando e nesesidat pa invertí den proyektonan na benefisio di hende, planeta i prosperidat. Invershon den hende pa medio di edukashon i desaroyo di abilidatnan, den planeta dor di invertí den infrastruktura sostenibel i aselerá transformashon bèrdè i invershon den prosperidat dor di invertí den inovashon, teknologia i entrepreneurship. Ofisina di Turismo di Kòrsou (CTB) ta sostené e tema di e aña aki suprayando e importansia di invershon sostenibel den hende, planeta i prosperidat na benefisio di desaroyo di turismo di Kòrsou.
Den su mensahe ofisial den kuadro di e tema di Dia Mundial di Turismo 2023, sr. Zurab Pololikashvili, Sekretario General di United Nations World Tourism Organization (UNWTO) a indiká: “Riba e Dia Mundial di Turismo aki, nos ta para ketu na e tema Turismo i Invershonnan Bèrdè. E tema no por tabata mas aktual. 2023 tabata e aña di mas kayente registrá i situashonnan ekstremo di wer manera ola di kalor por bira e normal nobo. Turismo mester adaptá. Pa esaki, nos mester rekonsiderá kon nos sektor ta keda finansiá. Nos mester hasié mas fásil pa tur tipo di invershonista sostené proyektonan relashoná ku turismo ku e potensial pa hasi un diferensia. Mirando mas dilanti, nos mester di invershonnan ku por empoderá turismo pa krea un futuro mihó i mas hustu pa tur hende”.
Pa CTB e tema di Dia Mundial di Turismo 2023 ta importante pa Kòrsou tambe. E kresementu den kantidat i kalidat di turista di estadia na Kòrsou mester sigui kana huntu ku invershon den hende, planeta i prosperidat. Invershon den hende pa medio di entre otro programanan di training den sektor di hospitalidat manera esnan ku ta tumando lugá aktualmente, tambe e programa di introdukshon di turismo na skol di fundeshi ku a inisiá aña pasá i e leerhotel kaminda studiantenan por siña i alabes ta eksperensiá e sektor. Tur ta akshonnan ku ta kontribuí na invershon den e hende komo piesa importante den desaroyo di nos turismo.
Riba e aspekto di invershon den planeta mester sigui wak maneranan kon huntu por aselerá e proseso di transformashon bèrdè den sektor di turismo. E aspekto di transformashon bèrdè no ta keda impulsá solamente pa problemanan ambiental pero tambe e demanda kresiente di biaheronan ku ta buska destinashonnan ku ta aliniá ku nan balornan di responsabilidat ambiental i sosial. Por último, pa invertí den prosperidat mester sigui krea entre otro e oportunidat pa mas inovashon i duna sosten na desaroyo di negoshinan, produktonan i/òf servisionan nobo na benefisio di industria di turismo. CTB lo sigui traha konhuntamente ku Ministerio di Desaroyo Ekonómiko (MEO) i demas partnernan den sektor públiko i privá pa asina duna un kontribushon na realisashon di proyektonan ku ta stimulá invershon den hende, planeta i prosperidat.
