For di Caracas
WILLEMSTAD- 4 di òktober 2023 – Dia 4 di òktober, Avior Airlines a resumí su buelo pa Kòrsou saliendo for di e siudat Caracas. E aerolínea ya tabata bula e konekshon Venezuela – Kòrsou den pasado. Na yegada di e promé buelo na CUR|Curaçao International Airport, e avion a keda risibí ku e tradishonal saludo di awa.
E buelonan di Avior Airlines lo ta dos biaha pa siman riba djárason i djadumingu. E buelonan ta keda efektuá ku un Boeing 737. E buelo ta sali Caracas 10:00AM i ta yega Kòrsou 10:45AM. E buelo di regreso ta sali for di Kòrsou pa 12:30PM i ta yega Caracas 1:15PM. E skema di buelo di Avior ta brinda mas fleksibilidat tantu pa e venezolano ku ke bishitá Kòrsou komo pa nos komunidat lokal ku ke biaha pa Venezuela. Durante di e seremonia Minister di Desaroyo Ekonómiko, sr. Ruisandro Cijntje, sr. Jorge Añez, propietario di Avior Airlines i sr. Jonny Andersen, CEO di CAP a trese un palabra kòrtiku dilanti pa selebrá e okashon spesial aki.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Avior Airlines ku reinisio di su konekshon entre Venezuela i Kòrsou i ta deseá nan tur kos bon.
