Ku partisipashon di 160 agente di biahe
WILLEMSTAD- 17 di òktober 2023 – Resientemente Ofisina di Turismo di Kòrsou (CTB) i KLM Alemania a organisá un roadshow na 4 siudat na e parti Nort di Alemania. Meta di e roadshow tabata pa halsa e konsientisashon riba loke Kòrsou tin di ofresé komo destinashon turístiko. E roadshow a konta ku partisipashon di 160 agente di biahe repartí riba e siudatnan Düsseldorf, Bremen, Hamburg i Berlin.
CTB i KLM Alemania kompañá pa 6 partner lokal i di Alemania a sòru pa ehekushon di e roadshow. Na yegada e agentenan di biahe a keda risibí ku un bibida di bon bini i algun pasapalu pa seguidamente partisipá na 8 presentashon informativo. Kada partner a presentá nan produkto i kontestá preguntanan di parti di e agentenan di biahe. E lokual a resaltá durante e programa parti anochi tabata na momentu ku e agentenan di biahe a haña e oportunidat pa traha riba un pintura artístiko riba canvas ku e tema ‘Kòrsou’. Esaki sigur a resultá den un aktividat alegre, artístiko i memorabel. E agentenan di biahe a pinta entre otro, nos famoso Handelskade, nos bida bou di laman, glas di kòktel i hopi mas. Na e siudat Berlin e agentenan di biahe a pinta Chichi mirando e konekshon ku Kòrsou ya ku Berlin ta e siudat natal di artista lokal Serena Israel. Na final, a forma di kada 15 pintura un arte grandi ku a keda opsekiá na un agente di biahe ku a pone e arte kolorido aki komo dekorashon den nan tienda. E aktividat di pintamentu a keda guiá dor di Götz Friedewald un artista profeshonal di Alemania.
CTB ta gradisí e partnernan ku a forma parti di e roadshow, kualnan ta: Inclusive Collection – World of Hyatt, Kontiki Beach Resort Curaçao, Curaçao Marriott Beach Resort, LionsDive Beach Resort Curaçao, Sandals Royal Curaçao i DER Touristik.
