den kuadro di e ‘leerhotel’ Parasasa Hotel Curaçao…
Willemstad – 19 di òktober 2023 – Dia 19 di òktober a tuma lugá seremonia di firmamentu di un akuerdo di kolaborashon entre ROC Mondriaan, Schoolbestuur Dienst Openbare Scholen (D.O.S.) i Rooms Katholiek Centraal Schoolbestuur (R.K.C.S.) i Universidat di Kòrsou Dr. Moises Da Costa Gomez (UoC). Meta di e akuerdo ta pa formalisá e trahamentu huntu den kuadro di e leerhotel Parasasa Hotel Curaçao. E balornan prinsipal di e akuerdo ku a keda firmá ta; kolaborashon, kompromiso, responsabilidat i transparensia. E seremonia di firmamentu a konta ku presensia di Minister di Enseñansa, sr. Sithree van Heydoorn i Minister Ruthmilda Larmonie – Cecilia den representashon di Minister enkargá ku desaroyo ekonómiko. Durante di e seremonia esnan presente a haña e oportunidat pa wak e promé kamber modelokual a duna un bista di kiko por spera asina ku e leerhotel, Parasasa Hotel Curaçao habri su portanan pa risibí su promé huéspetnan den e promé kuartal di 2024.
Den e leerhotel, studiantenan ta sigui lès práktiko enfoká riba materianan relashoná ku maneho den e industria di hospitalidat i turismo. E leerhotel ta bini di e fundashon Curaçao Hospitality and Tourism Training Centre (CHTTC) kual ta un kolaborashon entre Ofisina di Turismo di Kòrsou (CTB), Curaçao Hospitality & Tourism Association (CHATA) i ROC Mondriaan na Den Haag. Alabes tin estrecho kolaborashon ku e institushonnan edukashonal Maris Stella SBO, Nilda Pinto SBO i Universidat di Kòrsou Dr. Moises Da Costa Gomez (UoC) i ku gobièrnu i sektor empresarial.
For di prinsipio di e aña eskolar aki e studiantenan di Nilda Pinto SBO i Maris Stella SBO ta siguiendo lès na e leerhotel. Parti mainta nan ta hañadiferente materiadirigí riba e kompetensianan ku ta keda rekerí den e industria di turismo i hospitalidat. Parti mèrdia nan ta bishitá diferente organisashon den e industria di turismo i hospitalidat pa asina opservá i eksperensiá di aserka kon e trabou ta bai den praktiká. E leerhotel su meta final ta pa duna un kontribushon na mas i mihó personal bon entrená i kapasitá pa subi e merkado laboral di industria di hospitalidat i turismo.
