WILLEMSTAD – 13 di novèmber 2023 – Ofisina di Turismo di Kòrsou ta raportá un kantidat di 466.834 turista di estadia den e promé 10 lunanan di 2023, kual ta un kantidat adishonal di 66.257 turista di estadia kompará ku mesun periodo na aña pasá. Aña pasá un total di 400.577 turista di estadia a keda risibí den e promé 10 lunanan di aña. Esaki ta un kresementu di 17%. Faltando solamente 2 luna mas pa 2023 terminá, CTB ta proyektá ku gran satisfakshon ku Kòrsou lo yama bon bini na un kantidat rèkòrt di turista di estadia na final di aña. Defakto, dentro di algun dia Kòrsou lo yama bon bini na mei mion turista di estadia. Esaki lo ta e promé biaha den historia ku Kòrsou lo risibí riba mei mion turista di estadia den un solo aña.
E imágen abou ta mustra e prestashon mensual di 2023 kompará ku e meta mensual i e kantidat di turista risibí na aña pasá.
Resultadonan notabel turista di estadia òktober 2023:
Na luna di òktober, Kòrsou a risibí un total di 47.812 turista di estadia kual ta 6% mas ku e 44.915 turista di estadia risibí na òktober 2022. E paisnan ku mihó prestashon den kantidat di turista di estadia risibí ta: Hulanda, Estádos Unídos, Colombia, Brazil i Canada. Huntu e paisnan aki ta representá 76% di e kantidat total di turista risibí.
Turistanan for di Hulanda i Europa: Nos merkado primario a eksperensiá un bahada registrando 13% ménos turista di estadia, ku un total di 17.395 turista hulandes na òktober 2023. Aña pasá un total di 20.102 turista hulandes a keda risibí na luna di òktober. E prestashon di region di Europa a konosé un bahada di 13%.
Turistanan for di Estádos Unídos: E merkado di Estádos Unídos a sigui mustra un kantidat stabil di turista di estadia registrando un total di 10.482 turista na òktober, 14% kresementu kompará ku òktober 2022. Kòrsou a risibí un kantidat remarkabel di 115.254 turista den e promé 10 lunanan di 2023. E kantidat di turista risibí for di Estádos Unídos ta representá te na e momentunan aki 25% di e total di turista di estadia risibí den e promé 10 lunanan di 2023. CTB ta antisipá ku e merkado aki tambe lo kontribuí na un aña di turismo espektakular pa Kòrsou ku lo kibra tur rèkòrt.
Turistanan for di Colombia: E kantidat di turista di estadia for di Colombia a registrá un kresementu di 36%. Total 3.527 kolombiano a keda risibí na òktober 2023. Te ku aworakí 29.587 kolombiano a bishitá nos pais den e promé 10 lunanan di aña. Faltando 2 luna pa aña terminá, CTB ta antisipá un kantidat rèkòrt di turista di estadia for di e merkado di Colombia. E kantidat di turista risibí for di e paisnan den Latino Amérika ta representá 6% di e total di turista di estadia risibí den e promé 10 lunanan di 2023.
Turistanan for di Brazil: Un total di 2.923 turista brasilero a keda risibí na luna di òktober, esaki ta 224% kresementu kompará ku òktober 2022 na momentu ku 902 brasilero a keda risibí. E konekshon direkto semanal for di Belo Horizonte ku Azul Airlines i e otro opshonnan di konekshon via Panama òf Bogotá, den kombinashon ku e esfuersonan kontinuo di merkadeo di Kòrsou na Brazil ta dunando fruta. Debí na e demanda haltu den turista for di Brazil, Azul a oumentá nan kapasidat na dos biaha pa siman entrante òktober. CTB ta antisipá ku e merkado aki lo sera aña ku un kantidat espektakular di turista di estadia. Total e aña aki te ku òktober un kantidat di 20.400 turista a keda registrá, esaki ta un kresementu di 146% kompará ku e mesun periodo na aña pasá.
Turistanan for di Canada: E inisio di e temporada haltu di turismo for di Canada tabata impreshonante. Total 2.183 kanades a bishitá Kòrsou na òktober 2023, esaki ta 43% mas ku e 1.530 kanadesnan registrá na òktober 2022. Durante henter aña Kòrsou tabatin e servisio di 3 biaha pa siman ku Air Canada for di Toronto. Awor Kòrsou ta konektá 2 biaha pa siman for di Montreal ku Air Canada i tin tambe servisio adishonal for di Toronto ku WestJet. E servisionan adishonal aki ta indiká un potensial grandi pa sigui krese e merkado kanades durante e periodo di wenter. E imágennan abou ta mustra primeramente e prestashon di kada region kompará ku aña pasá, inkluyendo e kantidat ku kada region ta representá den e total di turista di estadia ku a bishitá nos pais.
E di dos imágen ta ilustrá e prestashon di e tòp 5 paisnan inkluyendo e tòp 3 estadonan for di kua nos turistanan ta prosedente.
Tipo di akomodashon, promedio di anochi i demografia
Informashon kompilá for di e karchinan di imigrashon ta mustra ku total turistanan a pasa un promedio di 7.9 anochi na Kòrsou durante luna di òktober. Di tur e turistanan, 56% a keda den un resort hotel. Hopi di e turistanan ku a biaha pa Kòrsou na òktober ta entre 25 – 44 aña (40%) miéntras 34% ta entre 45 – 64 aña. E imágennan abou ta ilustrá e akomodashon i demografia di e turistanan ku a biaha pa Kòrsou na òktober 2023.
E imágennan abou ta ilustrá e akomodashon i demografia di e turistanan ku a biaha pa Kòrsou na òktober 2023.
