Próksimo Dianan di Registrashon 18 i 19 di novèmber na Hòfi Popo Rojer
WILLEMSTAD – 13 di novèmber 2023 – Resientemente un total di 88 kursista a risibí nan sertifikado komo parti di e programa di training Her & Bijscholingstraject Hospitality Sector. Ta trata di primeramente e siguiente kursonan: asistente kòki, asistente bartènder, weiter i housekeeping. E personanan aki a sigui un kurso kòrtiku intensivo (crash course) den kua nan a haña sufisiente konosementu básiko teorétiko i tambe práktika pa por drenta e industria di hospitalidat. E grupo a konsistí di un total di 32 asistente kòki, 18 asistente bartènder, 16 weiter i 11 persona ku a risibí sertifikado di Housekeeping. Ademas, un grupo di 11 persona representando diferente organisashon den e industria di hospitalidat a risibí nan sertifikado di Leermeester training (instruktor). E personanan aki ta esnan responsabel pa guia e kursistanan na nan leerbedrijf. Durante un seremonia ameno, Minister di Desaroyo Ekonómiko, sr. Ruisandro Cijntje huntu ku Counterpart Director di Ofisina di Turismo di Kòrsou, sr. Muryad de Bruin a hasi entrega di sertifikado na e partisipantenan.
E kursonan di asistente kòki, asistente bartènder i weiter tabatin un durashon di 12 siman. Despues di a kompletá e kurso, diferente di e partisipante ta trahando aktualmente na un leerbedrijf den industria di hospitalidat pa un periodo di 5 luna i ta risibí un salario. Despues di kompletá e 5 lunanan, e kompania tin e posibilidat pa ofresé e partisipante un kontrato di trabou basá riba su prestashon. Tambe e kursistanan a kompletá e Personal Empowerment training kual tabata dirigí riba desaroyo di nan abilidatnan interpersonal.
E programa di training, Her & Bijscholingstraject Hospitality Sector ta resortá bou di Ministerio di Desaroyo Ekonómiko (MEO) miéntras Ofisina di Turismo di Kòrsou (CTB) ta responsabel pa implementashon di e programa. E programa ta keda ehekutá den estrecho kolaborashon ku Ministerio di Labor (SOAW), Ministerio di Enseñansa (OWCS) i partnernan den sektor privá. Den e periodo tras di lomba a ehekutá training di guia turístiko, resepshonista, masashi, asistente kòki, weiter, asistente bartènder i housekeeping. Mas di 30 kompania ta kontribuyendo na e proyekto komo leerbedrijf brindando di e manera aki e partisipantenan un oportunidat pa por haña un trabou den industria di hospitalidat. Pa registrá pa e programa di training bai riba www.curacaotouristboard.com/education/ òf bishitá e Dianan di Informashon i Registrashon, 18 i 19 di novèmber próksimo di 10or di mainta pa 3or di atardi na Hòfi Popo Rojer (Barber).
CTB, MEO, SOAW i OWCS ta felisitá e kursistanan i ta deseá nan tur klase di éksito den e industria di hospitalidat.
